კოალიცია „ქართული ოცნების" პრეზიდენტობის კანდიდატმა გიორგი მარგველაშვილმა სამეგრელოს რეგიონში წინასაარჩევნო შეხვედრები დღეს, 8 ოქტომბერს ზუგდიდში დაასრულა. კოლიციის კანდიდატის მხრადასაჭერად ზუგდიდის ცენტრალურ ხეივანთან 300-მდე ადამიანი იყო შეკრებილი. ზუგდიდში ასევ იმყოფებოდა პრემიერ-მინისტრი ბიძინა ივანიშვილი და უმრავლესობის წევრი ეკა ბესელია. პრემიერმა მოსახლეობას განუცხადა, რომ ის არსად არ აპირებს წასვლას და თავის გუნდთან ერთად 20 წლიანი მუშაობის ციკლს იწყებს. ივანიშვილმა აღნიშნა რომ აუცილებლად დააბრუნებს დევნილებს სახლებში და აფხაზებთან მეგობრულ ურთიერთობებს აღადგენს. მინისტრმა ქვეყანაში არსებულ ვითარებაზეც გაამახვილა ყურადღება და განაცხადა, რომ "ვერავინ იტყვის იმას, რომ დღეს მოსახლეობაზე, მთავრობა და პოლიცია ძალადობს, როგორც ეს იყო წინა ხელისუფლების დროს. მარგველაშვილმა საოცრება მოახდინა განათლების სისტემაში, ასევე აღადგინა უფასო ბაგა-ბაღები სოფლებში", -აღნიშნა ივანიშვილმა. ივანიშვილმა აქვე დასძინა, რომ სამეგრელოს ახალი პრეზიდენტის და მთავრობის ხელი უნდა დაეტყოს. მოგვიანებით პრეზიდენტობის კანდიდატმა გიორგი მარგველაშვილმა, ხალხს საარჩევნო პროგრამა გააცნო და აღნიშნა, რომ ქვეყანაში მისი პრეზიდენტობის პერიოდში იგეგმება სოციალურ-ეკონომიკური აღორძინება. "ჩვენი გამარჯვება არჩევნებში უალტერნატივოა, მაგრამ ეს გამარჯვება უნდა იყოს თითოეული ქართველის მიერ ხელმოწერილი. სამეგრელოდან ჩვენ უნდა მივიღოთ ყველაზე მაღალი პროცენტი იმისთვის რომ გვქონდეს უფრო მეტი ლეგიტიმაცია. არ წამოწყებულა პროცესი საქართველოში, რომელსაც წარმატება ჰქონდა და რომლის ინიციატორი, სულის ჩამდგემლი არ ყოფილიყო სამეგრელო",- განაცხადა მარგველაშვილმა მარგველაშვილმა ასევე განაცხადა, რომ სამეგრელომ ყველაზე დიდი ტკივილი გადაიტანა, რადგან მისი თქმით აქ მოსახლეობის დატერორება ხორციელდებოდა. "ჩვენმა მთვარობამ დაიწყო წინა ხელისუფლებისგან მიტაცებული ქონების გაყიდვა და მიღებული თანხით 450-მდე დევნილი ოჯახი სიმბოლურ ფასში, 1 ლარად საცხოვრებელ სახლს საკუთრებაში მიიღებს"- განაცხადა პრეზიდენტობის კანდიდატმა.