სამეგრელო-ზემო სვანეთის მხარეში პრეზიდენტის რწმუნებული-გუბერნატორი თენგიზ გუნავა გიორგი მარგველაშვილის მხრიდან გუბერნატორების კრიმინალებად მოხსენიებას გამოეხმაურა. გუნავა მიიჩნევს, რომ პრეზიდენტობის კანდიდატის მხრიდან კაკეთებული ეს განცხადება შეცდომა იყო. გუნავა აცხადებს, რომ ის პრეზიდენტ სააკაშვილის დანიშნული კადრია და თუ საპრეზიდენტო არჩევნებში „ქართული ოცნების“ კანდიდატი გაიმარჯვებს, თანამდებობას დატოვებს და ბრძოლას ოპოზიციის რიგებში გააგრძელებს. „ მე ყოველთვის ჩემს ხალხს ვემსახურებოდი და მომავალშიც მის სამსახურში ვიქნები. მე ვარ პრეზიდენტ მიხეილ სააკაშვილის მიერ დანიშნული რწმუნებული, იმ გუნდის წარმომადგენელი, რომელსაც პრეზიდენტი ხელმძღვანელობს და საშუალებას არ მივცემ მარგველაშვილს, თვითონ გამათავისუფლოს თანამდებობიდან. თანამდებობას თავად დავტოვებ, თუ საჭირო გახდება — ბუნებრივია, თუ საპრეზიდენტო არჩევნებში „ქართული ოცნების“ კანდიდატი გაიმარჯვებს, თანამდებობიდან თავადვე წავალ და ოპოზიციიდან ვიბრძოლებ“, — აღნიშნა თენგიზ გუნავამ. გიორგი მარგველაშვილმა ქუთაისში გუშინ გამართულ შეხვედრაზე განაცხადა, რომ გამარჯვების შემდეგ „კრიმინალ გუბერნატორებს“ თანამდებობიდან მოხსნის.