ზუგდიდის მუნიციპალიტეტის სოფლებში, დარჩელსა და ინგირში, პროექტ “საზოგადოების ჩართულობა დემოკრატიული თვითმმართველობისათვის” ფარგლებში მორიგი შეხვედრები გაიმართა. შეხვედრებზე, მიმოხილული იქნა ადგილობრივი მოსახლეობის პრობლემები, მოქალაქეთა ჩართულობისა და თვითმმართველობაში დაგეგმილი რეფორმის ძირითადი საკითხები. სოფელ დარჩელის მოსახლეობის თქმით,ძირითადად, მოუწესრიგებელია შიდა გზები და საბავშვო ბაღის პრობლემა აწუხებთ. ქვემო დარჩელის მოსახლეობა საბავშვო ბაღის აღდგენას ითხ ოვს. მათი განმარტებით, სოფელში მოქმედ ერთადერთ საბავშვო ბაღამდე 3 კილომეტრის გავლა უწევთ. „მე ორი შვილის დედა ვარ და საბავშვო ბაღამდე საკმაოდ დიდი მანძილის გავლა გვიწევს. ჩვენს უბანში 30-მდე სკოლამდელი ასაკის ბავშვია. მათ შორის დარჩელის ცენტრის ბაღში უსახრობის გამო ბევრი ვერ დადის“, - აღნიშნა შეხვედარზე ნანა ბიგვავამ. სოფელ ინგირის მოსახლეობის განმარტებით კი, მათი ყველაზე დიდი პრობლემა მიწის ფართობებია, რომელიც ეკონომიკის სამინისტრომ 2 წლის წინ გაყიდა. ადგილობრივების თქმით, მათ ამ საკითხზე სხვადასხვა უწყებას რამდენჯერმე მიმართეს, თუმცა, მათივე თქმით, დღემდე შედეგს ვერ მიაღწიეს. აღსანიშნავია, რომ ზუგდიდის მუნიციპალიტეტის გამგებლის მოადგილის მოვალეობის შემსრულებელმა, გიორგი თოდუამ, რომელიც შეხვედრებს პროექტის ფარგლებში ესწრებოდა, სოფლის მოსახლეობის პრობლემები ადგილზე მოისმინა. ასევე, მნიშვნელოვანია, რომ კონკრეტულ თემში არსებული პრობლემები, რომელიც მსგავსი შეხვედრებიდან იქნება მოკვლეული, გათვალისწინებულ იქნება ზუგდიდის მუნიციპალიტეტის გამგეობის, საკრებულოსა და სხვა უწყებებისათვის შესათავაზებელ რეკომენდაციებში. შეხვედრები ტარდება ასოციაცია „ათინათის“, “საერთაშორისო გამჭვირვალობა-საქართველოს” ზუგდიდის ოფისის და “სამოქალაქო მონიტორინგისა და კვლევების ცენტრის” კოალიციური პროექტის “საზოგადოების ჩართულობა დემოკრატიული თვითმმართველობისათვის” ფარგლებში. პროექტი “ევრაზიის თანამშრომლობის ფონდის” ფინანსური მხარდაჭერით ხორციელდება.