ძლიერმა ქალმა ზუგდიდის მუნიციპალიტეტის სოფელ ოდიშში მცხოვრებ, აფხაზეთიდან დევნილ ქობალიების საცხოვრებელ სახლს სახურავი მთლიანად გადახადა. ქობალიების სახლში 12 სული ცხოვრობს, მათ შორის 6 მცირეწლოვანი ბავშვია. ისინი ღია ცისქვეშ არიან დარჩენილები. „მთელი ღამის განმავლობაში არ გვიძინია, შემდეგ შუქიც ჩაქრა, სანთელიც არ გვქონდა...ყველას ვთხოვ, მოგვაქციონ ყურადღება. ბავშვისთვის საჭმელს ვერ ვამზადებ, ყოველი წუთი ჩვენთვის გადამწყვეტია“, - ამბობს ნანა ნემსიწვერიძე. მისი განმარტებით, ერთ სახლში, სადაც სამი ძმის ოჯახი ერთად აფარებს თავს ოთხი ოთახისგან შედგება და ისიც საცხოვრებლად გამოუსადეგარია. ოჯახის წევრები გაუსაძლის საყოფაცხოვრებო პირობებზე საუბრობენ. ქობალიების მრავალსულიანი ოჯახი დახმარებას და საცხოვრებელი ფართით დაკმაყოფილებას ითოვს. სამეგრელო-ზემო სვანეთის დევნილთა სამმართველოს ხელმძღვანელმა ირაკლი ქოჩუამ რადიო „ათინათს“ განუცხადა, რომ ქობალიების ოჯახში შექმნილი ვითარების შესახებ ზუგდიდის გამგეობას აცნობებს. „ჩვენ ბიუჯეტი არ გვაქვს და პრობლემების მოგვარებას გამგეობას ვთხოვთ. მათ სახლს აუცილებლად გადაუხურავენ“, - აცხადებს ირაკლი ქოჩუა. ცნობისთვის, დასავლეთ საქართველოში ძლიერი ქარია და ის ხვალ დილამდე შენარჩუნდება. ზუგდიდის მუნიციპალიტეტში, ძლიერის ქარის გამო ათეულობით სახლს სახურავი გადახადა, წაქცეულია ხეები და ასევე დაზიანებულია ელექტრსადენები.