ტელეკომპანია „TV3“–ის გათავისუფლებულმა ჟურნალისტმა ბელა ზაქაიძემ პირველი კომენტარი გააკეთა. როგორც მან ამავე ტელეკომპანიის ეთერში, სატელეფონო ჩართვისას განაცხადა, ცხინვალის იზოლატორში მისთვის ფიზიკური და სიტყვიერი შეურაცხყოფა არ მიუყენებიათ, თუმცა ფსიქოლოგიური ზეწოლა ხორციელდებოდა. მისივე ინფორმაციით, ცხინვალის იზოლატორში არსებული ვითარება რთულია. „წინასწარი დაკავების იზოლატორში ორი დღე ვიყავით, სადაც საკმაოდ მძიმე მდგომარეობა, არაადამიანური პირობები, არაჰიგიენური მდგომარეობა იყო. ძალიან ციოდა. არ იყო გამათბობელი საშუალება. მთელი დღის განმავლობაში საკვები მხოლოდ დღის ბოლოს მოგვაწოდეს. მხოლოდ ჩაისა და პურზე ვიყავით. სხვადასხვა პირი გვიძახებდა, საკნიდან გავყავდით. სხვადსხვა პირებმა არაერთხელ გამიყვანა. ზუსტად არ ვიცით, კონკრეტულად რომელი უწყების წარმომადგენლები იყვნენ ისინი. რიგ შემთხვევებში იყო დაკითხვები, რომელსაც ოფიციალური სახე ჰქონდა და რიგ შემთხვევებში – გასაუბრებები“, – განაცხადა ბელა ზაქაიძემ. მისივე თქმით, ამ ადამიანებს აინტერესებდათ, პირველად იყო თუ არა იგი სამხრეთ ოსეთში. „ზეწოლას განვიცდიდი იმიტომ, რომ მეკითხებოდნენ, პირველად ხარ თუ არა სამხრეთ ოსეთშიო. ვეუბნებოდი, კი, პირველად ვარ და იმ სოფელშიც, აძვში, პირველად ვიყავი. თუმცა ისინი ამბობდნენ, რომ აქვთ ბაზა, სადაც ვფიქსირდებოდი, თითქოს ადრეც ვიყავი იქ ნამყოფი", – აღნიშნა ბელა ზაქაიძემ. მისივე თქმით, როდესაც მან იქ მყოფ პირებს უთხრა, რომ საკანში საშინელი, გაუსაძლისი სიტუაცია იყო და იქ არ შეიძლებოდა გაჩერება, ცინიკურად პასუხობდნენ. „მეუბნებოდნენ: სუნია? სუნი გაწუხებს? გარკვეული პირების მხრიდან იყო ცინიკური დამოკიდებულება. თუმცა იყო ერთი ახალგაზრდა ბიჭი, რომელიც დამამახსოვრდა. ის ქართულად გველაპარაკებოდა, საკმაოდ კეთილგანწყობილი იყო და თავაზიანად გვექცეოდა", – განაცხადა ბელა ზაქაიძემ.