25 სექტემბერს აფხაზეთის თვითგამოცხადებული რესპუბლიკის პარლამენტი „ეკონომიკურ საკითხებში სასამართლო და საარბიტრაჟო გადაწყვეტილებების აღიარებისა და აღსრულების შესახებ“ რუსულ - აფხაზური შეთანხმების რატიფიცირების საკითხს განიხილავს. 

როგორც ცნობილია, მოსკოვმა 1 სექტემბრიდან სოხუმს დაფინანსება შეუჩერა, სხვა პირობებთან ერთად, ამ დოკუმენტის დამტკიცების მოთხოვნით.

აფხაზური ოპოზიციის ნაწილი ე.წ. პარლამენტს მოუწოდებს გადადოს აღნიშნული შეთანხმების რატიფიცირება. განცხადების ავტორები „პრეზიდენტ“ ასლან ბჟანიას მხრიდან „საკანონმდებლო ორგანოზე უპრეცედენტო ზეწოლაზე“ მიუთითებენ.

„გამოიყენეს ყველაზე ბინძური პოლიტიკური ტექნოლოგიები, რომლებიც აშკარა შანტაჟს ესაზღვრება. ხელისუფლებამ ასევე მოიზიდა გარე დაინტერესებული მხარეები, რომლებიც, დაუფარავად ახვევნ თავს საკუთარ თვალსაზრისს აფხაზ სხვადასხვა საინფორმაციო პლატფორმებზე. მოეწყო აქცია საბიუჯეტო დაწესებულებებში ხელმოწერების შეგროვების მიზნით, რომელიც საბოლოოდ ჩაიშალა“, - ნათქვამია საზოგადოებრივი ორგანიზაციებისა და პარტიების განცხადებაში, რომელსაც ხელს აწერენ „აფხაზეთის ეროვნული ერთიანობის ფორუმი“, „აფსნი“, „არუაა“, „აფხაზთა სახალხო მოძრაობა“ და „ჩვენი დედაქალაქი“.

ოპოზიციონერები მიიჩნევენ, რომ პარლამენტი არის „ერთადერთი ლეგიტიმური ორგანო“ და „პოლიტიკური სტაბილურობის გარანტი“, ხოლო „პარლამენტისადმი ნდობის გაზრდა აპარტამენტების საკითხში დეპუტატების უმრავლესობის მტკიცე პოზიციით არის განპირობებული“.

მანამდე ბჟანიამ აფხაზური ტელევიზიისთვის მიცემულ ინტერვიუში განაცხადა, რომ „ეს შეთანხმება არანაირ რისკს არ უქმნის“ სოხუმს.

ინფორმაცია მოსკოვის მიერ სოხუმისთვის დაწესებულ სანქციებზე, სექტემბრის დასაწყისში, აფხაზეთის თვითაღიარებული რესპუბლიკის ე.წ საგარეო საქმეთა მინისტრმა სერგეი შამბამ დაადასტურა. 
მისივე ცნობით, ფინანსური დახმარება არ აღდგება, სანამ აფხაზური მხარე არ შეასრულებს შემდეგ ვალდებულებებს:

- ეკონომიკურ საქმეებზე სასამართლო და საარბიტრაჟო გადაწყვეტილებების აღიარებისა და აღსრულების შესახებ შეთანხმების რატიფიცირება;

— რუსეთის იურიდიული პირების მიერ აფხაზეთის ტერიტორიაზე საინვესტიციო პროექტების განხორციელების შესახებ შეთანხმების ძალაში შესვლის უზრუნველყოფა;

— რუს ინვესტორებზე შეზღუდვების მოიხსნა კომერციული უძრავი ქონების ბაზარზე (ბინები).

აფხაზეთის დე ფაქტო რესპუბლიკის ე.წ. პარლამენტმა 25 ივლისს უკან გაიწვია „აპარტამენტების“ შესახებ კანონპროექტი.

დოკუმენტი გალის, ოჩამჩირის და ტყვარჩელის რაიონებში 10 ათასამდე ბინის მშენებლობას ითვალისწინებდა. "აპარტ-ოტელებისა და აპარტამენტების სამართლებრივი მდგომარეობის მოწესრიგების შესახებ" კანონპროექტის ინიციატორი აფხაზი ლიდერი ასლან ბჟანიაა. ის აქტიურად ლობირებდა მას.

ინფორმაციისთვის, აფხაზეთის დე ფაქტო რესპუბლიკის ე.წ. პარლამენტმა 2023 წლის 27 დეკემბერს, გამთენიისას, მოახდინა ბიჭვინთის აგარაკების შესახებ შეთანხმების რატიფიცირება, იმავე დილას, ე.წ. პრეზიდენტმა ასლან ბჟანიამ "პარლამენტის" მიერ მიღებულ კანონებს ხელი მოაწერა და დაამტკიცა ბიჭვინთის ყოფილი სახელმწიფო აგარაკის რუსეთისთვის გადაცემა.