ზუგდიდში კონსტიტუციის პროექტის საჯარო განხილვაზე არასამთავრობო ორგანიზაცია „თანასწორობის მოძრაობის“ წარმომადგენელმა ცაბუნია ვართაგავამ საკონსტიტუციო კომისიის წევრის თენგიზ შარმანაშვილისგან ქალის მიმართ გაკეთებული განცხადების გაკეთების გამო საჯაროდ ბოდიშის მოხდა მოითხოვა.

შარმანაშვილმა პრეზიდენტის მრჩეველთან ანა დოლიძესთან კამათისას თქვა, რომ ქალთან პოლემიკაში არ შევა.

„ბატონი თენგიზი საკმაოდ აგდებული ტონით საუბრობს, რომ ქალთან ვერ შევა პოლემიკაში. ძალიან სამწუხარო განცხადება იყო და კარგი იქნება, თუ ბოდიშს საჯაროდ მოიხდის“, - აღნიშნა ვართაგავამ.

შარმანიშვილმა კი თქვა, რომ „ზედმეტად გაცხარდა“ და საკუთარი განცხადების გამო ბოდიშიც მოიხადა.

ვართაგავამ ასევე კონსტიტუციაში ქორწინების დეფინიციის განსაზღვრაზე დასვა შეკითხვა. მას კომისიისგან აინტერესებდა, თუ რატომ გახდა აუცილებელი კონსტიტუციაში ოჯახის ცნების დეფინიციისას ქალისა და მამაკაცის დაკონკრეტება, როდესაც, ლგბტ პირებს შორის კონსტიტუცია ისედაც კრძალავს ქორწინებას.

„იმ დროს, როდესაც ისედაც აკრძალულია ლგბტ წარმომადგენლებს ქორწინება, რატომ დადგა ამ მუხლის დაკონკრეტების აუცილებლობა მაშინ, როდესაც სხვა კონსტიტუციური უფლებაც შეზღუდული აქვთ“, - აღნიშნა ვართაგავამ.

მის კითხვას ეკე ბესელიამ უპასუხა და აღნიშნა, რომ ეს პრიცნიპული საკითხია და ქვეყნის მოსახლეობის უმრავლესობის აზრია.

„ფორმულირების სახით ვასწორებთ, რომ ეს არის უსაფრთხოების თემა. ეს არის ქვეყნის უსაფრთხოების თემა, ტრადიციების გამოხატულება, უმრავლესობის პოზიცია. შეიძლება თქვენი აზრის მსგავსზე იყოს რამდენიმე ადამიანიც, მაგრამ ამ გადაწყვეტილებას მხარი დაუჭირა აბსოლუტურმა უმრავლესობამ მცირე გამონაკლისის გარდა“, - განაცხადა ბესელიამ.

ზუგდიდში, მოსწავლე-ახალგაზრდობის სასახლეში საკონსტიტუციო პროექტის განხილვა 4 საათს გაგრძელდა. შეხვედრას პრეზიდენტი, პარლამენტის თავმჯდომარე, მაჟორიტარი დეპუტატები, საჯარო მოხელეები, სკოლის მასწავლებლები, დირექტორები, სხვადასხვა პოლიტიკური პარტიის მხარდამჭერები და საზოგადოებრივი ორგანიზაციების წარმომადგენლები დაესწრნენ. შეხვედრაზე კითხვები გამომსვლელებმა დასვეს, მათ შორის იყო რამდენიმე საჯარო მოხელე.