ქალაქ ზუგდიდის მერიამ უეფას მესამე კატეგორიის შესაბამისი სტადიონის სამშენებლო სამუშაოების პირველი ეტაპი ლიკვიდაციამდე ცოტა ხნით ადრე ჩაიბარა. მერიის ქალაქმშენებლობის სამსახურის ყოფილი უფროსის მამუკა ლოგუას თქმით, სამშენებლო კომპანიასა და მუნიციპალიტეტს შორის მიღება-ჩაბარების აქტი შედგა და ქონება ამჟამად მუნიციპალურ საკუთრებაშია.

“სტადიონის მშენებლობის ეტაპი მორჩა. კომპანიამ სამუშაოები პროექტის მიხედვით შესრულა და ჩვენ ის შესაბამისად ჩავიბარეთ“ , - აღნიშნა ლოგუამ.



ახლადშექმნილ მერიაში აცხადებენ, რომ სტადიონის პირველი ეტაპის მშენებლობის საკითხს ახლა სწავლობენ. რადიო „ათინათის“ კითხვებზე, აპირებს თუ არა ზუგდიდის ახალი მერია ფედერაციას ბეტონის სარტყელთან დაკავშირებით რეკომენდაციის გაწევით მიმართოს, გვიპასუხებენ, რომ ამ საკითხს სწავლობენ და დეტალები მოგვიანებით გახდება ცნობილი. რაც შეეხება მშენებლობის მეორე ეტაპს, მისი დაწყების ტარიღს მერიაში ამჯამად ვერ აკონკრეტებენ.

ზუგდიდის ახალი სტადიონის სათამაშო მოედანზე აშენებულმა ბეტონის კედელმა სოციალურ ქსელში მომხარებლების უკმაყოფილება გამოწვია. ისინი წერდნენ, რომ ბეტონის გალავანი ფეხბურთელების უსაფრთხოებისთვის საშიშია. მოგვიანებით, საკითხთან დაკავშირებით კომენტარი ზუგდიდის მერიაში გააკეთეს და აღნიშნეს, რომ მშენებლობა სტანდარტების დაცვით მიმდინარეობს. კომპანიაში „დაგი“ კი ამბობდნენ, რომ ისინი სამუშაოებს პროექტის მიხედვით ასრულებდნენ. „რაც შეეხება იმას, შეესაბამება თუ არა ეს სტანდარტებს, ჩვენს კომპეტენციას ცდება“, - განაცხადეს სამშენებლო კომპანიაში.



თავის მხრივ, საქართველოს ფეხბურთის ფედერაციის სტადიონების განყოფილების ხელმძღვანელმა და უეფა-ს მედიაოფიცერმა მერაბ კვარაცხელიამ რადიო „ათინათს“უთხრა, რომ ზუგდიდის ახალმა სტადიონმა უეფას მესამე კატეგორიის სტანდარტი, შესაძლოა, ვერ დააკმაყოფილოს. მისივე თქმით, შესაძლებელია, რომ შეცდომა სამშენებლო კომპანიამ დაუშვა, თუმცა აქვე დასძენს, რომ კომპანია, სავარაუდოდ, უეფას, ფიფას და სფფ-ს სტანდარტებით მოქმედებდა. მისივე თქმით, ეს მისი, როგორც ექსპერტის შეფასებებია და ფედერაციის მხრიდან კონკრეტული დასკვნები მაშინ გახდება ცნობილი, როცა კომპანია სფფ-ს ოფიციალურად მიმართავს.

ზუგდიდის ცენტრალური სტადიონის პროექტი ძირითადი და სათადარიგო სტადიონის მშენებლობას ითვალისწინებს მთავარი მოედანი, რომლის სამუშაოები ოქტომბერში დასრულდა, 7 200-ზე მეტ მაყურებელს დაიტევს. ასევე, დაგეგმილია 1224 ადამიანზე გათვლილი სათადარიგო მოედნის მშენებლობა და განათების მოწყობა. მთავარი მოედანი ბუნებრივი საფარით, ხოლო სათადარიგო ხელოვნურით დაიფარება.

პროექტის საერთო ღირებულება 20 მილიონი ლარია, სტადიონის პირველი ეტაპის სამუშაოებისთვის 9 747 000 ლარი იყო გათვალისწინებული. პროექტი სახელმწიფო ბიუჯეტის დაფინანსებით ხორციელდება. სტადიონები და დამხმარე ინფრასტრუქტურა 6,5 ჰექტარ მიწის ფართობს დაიკავებს.

ამავე თემაზე:

მერია ზუგდიდის სტადიონზე: ფედერაციის რეკომენდაციის შესაბამისად ვიმოქმედებთ (ვიდეო)

ზუგდიდის სტადიონის დამპროექტებელი: არ ვიცი, რომელ ბეტონის კედელზეა საუბარი

ექსპერტი: ზუგდიდის ახალმა სტადიონმა უეფას მესამე კატეგორიის სტანდარტი, შესაძლოა, ვერ დააკმაყოფილოს

ზუგდიდის ახალ სტადიონზე ბეტონის სარტყელი შემოავლეს