ინციდენტების პრევენციისა და მათზე რეაგირების მექანიზმის ფარგლებში (IPRM) დიალოგის აღდგენის შესახებ შეთანხმება ჟენევის საერთაშორისო დისკუსიაზე, ფაქტობრივად, მიღწეულია, ამის შესახებ აფხაზეთის ავტონომიური რესპუბლიკის უმაღლესი საბჭოს (დევნილობაში) თავმჯდომარემ ჯემალ გამახარიამ თბილისში გამართულ პრესკონფერენციაზე განაცხადა.

„არსებობს ჟენევის ფორმატი, რომელიც ერთადერთი ადგილია, სადაც აფხაზური, ოსური მხარეები პიროვნულად მონაწილეობენ. ისინი არ მონაწილეობენ, მაგალითად, როგორც აფხაზეთის ე.წ. საგარეო საქმეთა სამინისტროს ან რაღაც უწყების წარმომადგენლები, ისინი იქ პიროვნულად მონაწილეობენ. კიდევ ე.წ. გალის ფორმატი არსებობდა, კონფლიქტების პრევენციის და მათზე რეაგირების მექანიზმი, რომელიც 2008 წლიდან აფხაზური მხარის პოზიციის გამო არ ფუნქციონირებს. ჟენევაში, ფაქტობრივად, უკვე მიღწეულია შეთანხმება იმასთან დაკავშირებით, რომ ეს ფორმატი აღდგეს. აქ სხვა საკითხი წარმოიშვა - ქართული მხარე არ აპირებს საზღვარგარეთის პასპორტით გადავიდეს და რაღაც შტამპი ჩაურტყან. ამ ფაქტორმა ფორმატის განახლება რამდენიმე თვით შეაფერხა. ახლახან გალის დე ფაქტო გამგებლის, ფილიას განცხადება მოვისმინეთ იმასთან დაკავშირებით, რომ ენგურის პირას, იქითა მხარეს, რაღაც სივრცის მოწყობა მიმდინარეობს, სადაც ეს შეხვედრები გაიმართება. ესეც ჟენევის ფორმატის შემადგენელი ნაწილია”, – განაცხადა ჯემალ გამახარიამ „კვირის" პრესკლუბში.

პრესკონფერენციაზე ის სერგეი შამბასა და ვახტანგ ყოლბაიას ონლაინ დიალოგსაც გამოეხმაურა და ხაზგასმით აღნიშნა, რომ ოკუპირებული აფხაზეთის დე ფაქტო ხელისუფლებასთან მიმართებაში,  "პოლიტიკის არანაირ ცვლილებას, არანაირი ახალი ფორმატის ჩამოყალიბებას ადგილი არ აქვს".

„ამას არავითარი კავშირი არ აქვს რკინიგზასთან, რომლის აღდგენაც, მინდა დაგარწმუნოთ, სანამ ეს ტერიტორია ოკუპირებულია, არ მოხდება. ამას არავითარი კავშირი არ აქვს (საბაჟო) ტერმინალთან , რომელიც მედიის ცნობით, ენგურის ხიდთან შენდება. ეს მხოლოდ ჟურნალისტის ინიციატივა იყო. ჩვენთვის აფხაზეთი ასევე არ არის კონფლიქტის მხარე, რადგან ეს ტერიტორია ოკუპირებულია და კონფლიქტის მხარე არის ოკუპანტი და არა სერგეი შამბა, ბჟანია და ა.შ. ამ ადამიანებთან მოლაპარაკება არ ყოფილა, არა, სამომავლოდ არანაირი გეგმები არ არის“, - განაცხადა მან.

4 დეკემბერს ოკუპირებული აფხაზეთის გალის რაიონის ე.წ ადმინისტრაციის ხელმძღვანელმა კონსტანტინე ფილიამ განაცხადა, რომ ისინი ინციდენტების პრევენციისა და მათზე რეაგირების მექანიზმის (IPRM) ფორმატში შეხვედრების ზონას ამზადებენ.

„ჩვენ ვამზადებთ ზონას, რომელიც მდებარეობს ენგურის ხიდთან, ჩვენს საგუშაგოზე შესვლამდე. პირველი პუნქტი მხოლოდ შემოწმებას გულისხმობს, ყველა საბაჟო სტრუქტურის გადაკვეთის გარეშე, ზემოთ ამზადებენ ტერიტორიას, იქნება საკონფერენციო დარბაზი და იქ გაიმართება შეხვედრები. ისე გამოვა, რომ ტერიტორია აფხაზური იქნება, მაგრამ ისე ჩვენთან სრულად ვერ შემოვლენ. იქ ვეცდებით ასეთ ფორმატში გავაკეთოთ, პრეტენზიები რომ დავაკმაყოფილოთ... ნორმალური დიალოგი დავიწყოთ“, - აღნიშნა მან.


ინფორმაციისთვის, ინციდენტების პრევენციისა და მათზე რეაგირების მექანიზმის შეხვედრები გალში, სადაც ქართული მხარე ოკუპირებული აფხაზეთის დე ფაქტო ხელისუფლებასთან ურთიერთობდა, 2018 წლიდან არ ჩატარებულა.

ივნისში, ბოლო შეხვედრაზე, აფხაზურმა მხარემ მოითხოვა დღის წესრიგიდან გიგა ოთხოზორიას მკვლელობის საკითხის ამოღება, რაზეც ქართულმა დელეგაციამ უარი განაცხადა, რის შემდეგაც აფხაზურმა და რუსულმა მხარეებმა შეხვედრა დატოვეს. ამის შემდეგ მხარეების შეხვედრა არ გამართულა.

სხვა საკითხებთან ერთად, გალის შეხვედრების განახლების თემა, 23 ნოემბერს, სოხუმში, ჟენევის საერთაშორისო დისკუსიების თანათავმჯდომარეებთან გამართულ შეხვედრაზეც განიხილეს.

გალში ინციდენტების პრევენციისა და მათზე რეაგირების მექანიზმის (IPRM) მუშაობის განახლების აუცილებლობაზე ოკუპირებული აფხაზეთის წარმომადგენლებმა, 11- 12 ივლისს, ჟენევაში საერთაშორისო მოლაპარაკებების 58 - ე რაუნდზეც ისაუბრეს.

ჟენევაში სამხრეთ კავკასიაში უსაფრთხოებისა და სტაბილურობის შესახებ მოლაპარაკებების 59 - ე რაუნდი 5 დეკემბერს დაიწყო და დღეს დასრულდება.