სენაკის რაიონულმა სასამართლომ ბალდის კანიონის მკვიდრი ინდიკო ბჟალავა, რომელიც სოფელში "კანიონ 350"-ის მშენებლობას ეწინააღმდეგება, პატიმრობაში დატოვა.

ადგილობრივი აქტივისტი ცოტნე თვარაძე რადიო "ათინათს" ეუბნება, რომ მოსამართლემ არ დააკმაყოფილა დაცვის მხარის შუამდგომლობა, რომელშიც დაკავებულის გირაოს საფუძველზე გათავისუფლებას ითხოვდა.

"სასამართლომ უსაფუძვლოდ დატოვა ინდიკო პატიმრობაში. მათ ხელჩასაჭიდი არაფერი არ ჰქონდათ. ყველა მოწმე, ვინც ამ საქმეშია, დაკავებულის უდანაშაულობას ამტკიცებს. ერთადერთი მომჩივნის ჩვენებაა, რომელშიც ის ამბობს, რომ ინდიკო მას დაემუქრა და მხოლოდ მისი ჩვენების საფუძველზე ტოვებენ პატიმრობაში. დაცვის მხარის შუამდგომლობა იყო მისი გირაოთი გამოშვება, ასევე, ჩვენ ვთქვით, რომ მოწმეებზე ზემოქმედების საფრთხე თუ კი არსებობდა, ინდიკო დროებით თბილისში იცხოვრებდა. თუმცა, ლოგიკურად, რომელ მოწმეზე უნდა მოეხდინა მას გავლენა, როდესაც ყველა მათგანი ამართლებდა", - განმარტა ადგილობრივმა.

მისივე თქმით, პროტესტი არ შეწყდება და "ბალდის კანიონის შესანარჩუნებლად" მოძრაობის ერთ-ერთი ამოცანა იქნება ის, რომ გარემოს დაცვისა და სოფლის მეურნეობის სამინისტრო ამ პრობლემით დაინტერესდეს და საჯარო განცხადებები გააკეთოს.

როგორც თვარაძე ამბობს, ბჟალავას მომდევნო სასამრთლო პროცესი, რომელზეც დაკავებულის საქმეს სიღრმისეულად განიხილავენ, 31 ივლისს გაიმართება. 

შეგახსენებთ, მარტვილში შსს-ს თანამშრომლებმა ბალდის კანიონის მშენებლობის მოწინააღმდეგე აქტივისტი ინდიკო ბჟალავა 12 ივნისს, სიცოცხლის მოსპობის მუქარის ბრალდებით დააკავეს.

იქამდე, 11 ივნისს გვიან ღამით მოძრაობის წევრებს კარავში სანადირო თოფითა და დანებით თავს დაესხნენ. დაჭრილი იყო მოძრაობის ორი წევრი.

თვეებია, ბალდელების ნაწილი კომპანია "კანიონ 350"-ს სამუშაოების შეჩერებას ითხოვს და ტერიტორიის გასხვისებას უკანონოს უწოდებს.

სახელმწიფო უწყებაში კი განმარტავენ, რომ ყველა სახის სამუშაო კანონის სრული დაცვით მიმდინარეობს.

კომპანიამ ორი წლის განმავლობაში 3 მილიონ ლარამდე ინვესტიცია უნდა განახორციელოს, მომდევნო 3 წლის ვადაში კი ბუნების ძეგლზე მოაწყოს ეკოტურისტული ინფრასტრუქტურა - ვიზიტორთა ცენტრი, როლერი ატრაქცია, კიდული ბილიკი და საფეხმავლო ბილიკი.



ამავე თემაზე:

"ბალდის კანიონის შესანარჩუნებლად" მოძრაობის წევრის სასამართლო პროცესი დღეს გაიმართება

ბალდის კანიონზე მშენებლობის შეჩერების მოთხოვნით მარტვილის მერიასთან მორიგი აქცია გაიმართა (ფოტო)

პოლიციამ ბალდის კანიონის მშენებლობის ერთ-ერთი მოწინააღმდეგე დააკავა

ბრაკონიერობა ბალდის კანიონზე - მოქალაქეს ტომარაში შვლის დანაწევრებული ხორცი ედო

ბალდის კანიონის ტერიტორიაზე ექსპერტთა ჯგუფი არ შეუშვეს - დაცული ტერიტორიების სააგენტო

ბალდის კანიონის ბიომრავალფეროვნებაზე ზემოქმედება შეფასდება - დაცული ტერიტორიების სააგენტო

ბალდის კანიონზე მშენებლობა დროებით შეჩერდება - ადგილობრივები