სოხუმში დააკავეს მამაკაცი, რომელიც ახალი ათონის მონასტრის წინამძღვარს, მიტროპოლიტ დოროფეის (დბარი) დაესხა თავს, ინფორმაციას აფხაზეთის დე ფაქტო რესპუბლიკის შსს ავრცელებს.

ამავე ცნობით, დაკავებულია ოჩამჩირის რაიონის მცხოვრები ირაკლი ბაღათელია. 36 წლის მამაკაცი, 2024 წლის 24 სექტემბერს აფხაზეთის სახელმწიფო უნივერსიტეტის შენობაში მომხდარ ინციდენტზე საპროცესო გამოძიების ფარგლებში იძებნებოდა.

ტელეგრამ არხების თანახმად, ბაღათელია სოფელ ლიხნიში მდებარე, „აფხაზეთის სულიერ სიმბოლოდ“ წოდებული ცაცხვის დაზიანების მონაწილე ძმებიდან ერთ - ერთია.

ინფორმაციისთვის, ოკუპირებული აფხაზეთი საქართველოს მართლმადიდებელი ეკლესიის კანონიკური ტერიტორიის ნაწილია, მაგრამ აფხაზეთის ომის დასრულების შემდეგ, ადგილობრივი სასულიერო პირები და მრევლი არ ცნობენ ქართული ეკლესიის ძალაუფლებას.

ამავე დროს, მართლმადიდებლური სტრუქტურების სახით ორი თემი ფუნქციონირებს, „აფხაზეთის მართლმადიდებელი ეკლესია“ მამა ბესარიონ აპლიას მეთაურობით და მართლმადიდებლური ორგანიზაცია - „აფხაზეთის წმინდა მიტროპოლია“, არქიმანდრიტ დოროფეი დბარის მეთაურობით, რომელიც ახალ ათონში მოქმედებს.

მედიის ინფორმაციით, პერიოდულად, „აფხაზეთის მართლმადიდებელი ეკლესია“ მოითხოვს „აფხაზეთის წმინდა მიტროპოლიის“ წარმომადგენლებისგან, გაათავისუფლონ ახალი ათონის მონასტერი და მათ გადასცენ, რაც ხშირად დავის მიზეზი ხდება.