ზუგდიდში პროევროპული პროტესტის 30-ე დღეს მოქალაქეები ისევ შეიკრიბნენ სამხარეო ადმინისტრაციის შენობასთან.

აქციაზე იმყოფებიან სხვადასხვა თაობის ადამიანები, აქტივისტები, არასამთავრობო სექტორის წარმომადგენლები, ოპოზიციური პარტიების წევრები, ახალგარზდები, რომლებსაც ხელში უჭირავთ საქართველოსა და ევროკავშირის დროშები.

აქ დამონტაჟებულია ეკრანი, სადაც სავარაუდოდ დაიწყება ტრანსლირება თბილისში მიმდინარე მოვლენების.

ამ წუთებში აქციის ორგანიზატორები სიტყვით გამოდიან და ქვეყანაში მიმდინარე პროცესებს მიმოიხილავენ.

მომიტინგეების მოთხოვნა უცვლელია, ისინი ხელახალი არჩევნების ჩატარებას და დემოსტრაციების დარბევისას დაკავებულები მოქალაქეების გათავისუფლებას მოითხოვენ.

,,პროტესტის მთავარი დანიშნულება არის ის, რომ ქვეყანა გავიდა კონსტიტუციური ჩარჩოებიდან და მათი დაპირებები ყველანაირ ჩარჩოს სცდება და ძალადობრივ რეჟიმაად იქცა სამწუხაროდ, რაც მიმდინარე პროცესებმაც აჩვენა. როგორც ევროინტეგრაციის კუთხით ასევე ადამიანების დაჭერის შემდეგ, ცემა, ძარცვა არცერთ კანონში არ წერია და სამწუხაროა, რომ არცერთი პოლიციელი არ არის ამის საპირწონედ დასჯილი, სამაგიეროდ აღძრულია 400 - მდე მოქალაქეზე ადმინისტრაციული და ნაწილზე სისხლის სამართლის საქმე. ყველა საერთაშორისო პარტნიორი ჩამოაშორა ქვეყანას და გაწირა იზოლაციისთვის, აქიდან გამომდინარე ძალიან მნიშვნელოვანია ამ ხიდების აღდგენა, გაძლიერება, ქვეყნაში არსებული პოლიტიკური კრიზისიდან გამომდინარე ასევე მნიშვნელოვანია ახალი არჩევნების ჩატარება, ის ლეგიტიმური პარლამენტი, რომელსაც ხალხი აირჩევს და უკანონოდ დაკავებული მოქალაქეების გათავისუფლება'', - უთხრა რადიო ,,ათინათს'' საჯარო მმართველობის დოქტორმა გიორგი აგირბაიამ.

აქციაზე დაანონსდა ხვალ დაგეგმილი ერთსაათიანი „ერთობის ჯაჭვი“ ზუგდიდში, რომელიც დადიანების სასახლიდან 15:00 საათზე დაიწყება და გაგრძელდება შემდეგი მიმართულებით: სკეიტპარკი, რაფიელ ერისთავის ბიუსტი და თავისუფლების მოედანი.

ცნობისთვის, მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში, მათ შორის ზუგდიდში, საპროტესტო აქციები იმართება.

ამავე თემაზე:

ზუგდიდში მოქალაქეები ისევ შეიკრიბნენ პროევროპულ აქციაზე - პროტესტის მე - 19 დღე (ფოტო)

პროტესტის მე-20 დღე - ზუგდიდში პროევროპული აქცია გრძელდება (ფოტო)

ზუგდიდში საპროტესტო აქცია საახალწლო ღონისძიებების პარალელურად მიმდინარეობს (ფოტო/ვიდეო)