უწყვეტი აქციების 51-ე დღეს, ზუგდიდში მოქალაქეები, სამოქალაქო აქტივისტები, არასამთავრობო ორგანიზაციების წარმომადგენლები და ოპოზიციონერი პოლიტიკოსები სახელმწიფო რწმუნებულის ადმინისტრაციის შენობასთან კიდევ ერთხელ შეიკრიბნენ.

ისინი აქციაზე, ტრადიციულად, საქართველოსა და ევროკავშირის დროშებით, ასევე, საპროტესტო ბანერებით მივიდნენ და ქვეყანაში მიმდინარე მოვლენებს გამოეხმაურნენ.

პროტესტის მონაწილეების მოთხოვნები კვლავ უცვლელია - დაინიშნოს ახალი, სამართლიანი საპარლამენტო არჩევნები და გათავისუფლდნენ "რეჟიმის" პოლიტპატიმრები, მათ შორის ზუგდიდში დაკავებული აქტივისტები.

"თავისუფლება ჩვენს პოლიტპატიმრებს, მარიამს, კერენს. აქ არის მიკოც, რომელსაც 5000 ლარი გამოუწერეს. 5000 ლარი რომ გადაიხადოს, ნიშნავს იმას, რომ მან მთელი ერთი წელი იშიმშილოს, არასრულწლოვან შვილთან ერთად. ამისთვის ვწირავთ ჩვენ ადამიანებს და რის გამო. ერთმა არასრულფასოვანმა ცნობიერების ადამიანმა რომ რეპრესიული კანონი მიიღო. თუ მიიღეს მანიფესტაციაში მონაწილეობის ამკრძალავი კანონი, მათ მოუწევთ ამის აღსრულება და ასე აღასრულებდნენ საბჭოთა სისტემაშიც რეპრესიულ კანონებს. სანამ ეს პროტესტის მუხტი არსებობს, პირიქით, მათაც უნდა გვითხრან მადლობა, რადგან რეპრესიული პოლიტიკა ყველასთან მიდის. ჩვენ აუცილებლად გავიმარჯვებთ, ჩვენს მეგობრებთან და პარტნიორებთან ერთად. პოლიტიკური პატიმრებიც აუცილებლად იქნებიან გარეთ. დიდება საქართველოს", - აღნიშნა სიტყვით გამოსვლისას "სამართლიანი არჩევნების" რეგიონულმა ხელმძღვანელმა დავით ლოგუამ.

შეგახსენებთ, მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში, მათ შორის ზუგდიდში, პერმანენტული საპროტესტო აქციები იმართება.

ამავე თემაზე:

სასამართლომ აქციაზე პიროტექნიკის გამოყენებისთვის მასწავლებელი 5000 ლარით დააჯარიმა

ზუგდიდში მასწავლებელი დააკავეს (ფოტო/ვიდეო)

ზუგდიდში აქციაზე მარიამ სიჭინავა და კერენ ესებუა დააკავეს

ზუგდიდში პროტესტის 48-ე დღეს კვლავ პოლიტპატიმრების გათავისუფლებასა და ახალ არჩევნებს ითხოვენ (ფოტო)

ზუგდიდის რაიონულმა სასამართლომ აქციის მონაწილეები ბალაკლავას ტარებისთვის დააჯარიმა