აფხაზეთის დე ფაქტო რესპუბლიკის შსს - ს ინფორმაციით, რუსეთის მოქალაქის კონსტანტინე ბელოზეროვის სხეულის დაზიანებების ფაქტზე სისხლის სამართლის საქმე აღიძრა, წერს „აიაირა“ .

გამოძიების ინფორმაციით, 13 მარტს, დაახლოებით 15:30 საათზე, გაგრაში, არძინბას გამზირზე, დაუდგენელმა პირმა „მტრული დამოკიდებულების საფუძველზე“ ესროლა ბელოზეროვს და დანაშაულის ადგილიდან მიიმალა.

ამავე ცნობით, ბელოზიოროვი გაგრის რაიონულ საავადმყოფოში გადაიყვანეს მარცხენა ფეხის დაზიანებებით.

გაგრის რაიონულმა სამმართველომ გამოძიება 15 მარტს დაიწყო, მასალები კი დე ფაქტო შსს-ს საგამოძიებო დეპარტამენტს 24 მარტს გადაეცა.

მანამდე, ტელეგრამის არხებმა გაავრცელეს ინფორმაცია, რომ 13 მარტს, რუსეთის მოქალაქე კონსტანტინ ბელოზიოროვი მეუღლესთან ერთად გაგრის ერთ-ერთ კაფეში იმყოფებოდა, რა დროსაც, იქ ადგილობრივი ე.წ. ადმინისტრაციის ხელმძღვანელი, იური ხაგუში მივიდა, თანმხლებ პირებთან ერთად.

მან, ბელოზიოროვს შენიშვნა მისცა იმის გამო, რომ ეს უკანასკნელი კაფეში შიშველი ტორსით შევიდა და საზოგადოებრივი თავშეყრის ადგილზე „წესების დაცვა” მოსთხოვა, რასაც ბელოზიოროვსა და ხაგუშს შორის, სიტყვიერი დაპირისპირება მოჰყვა, რომელიც საბოლოოდ ფიზიკურში გადაიზარდა და გასროლით დასრულდა.

დაჭრილი რუსეთის მოქალაქე, თავდაპირველად გაგრის საავადმყოფოში მოათავსეს, შემდეგ სოხუმში გადაიყვანეს, ხოლო მოგვიანებით – სოჭის საავადმყპფპს რეანიმაციულ განყოფილებაში.

ტელეგრამის არხების ცნობით, გაგრაში მომხდარი ინციდენტიდან სულ რაღაც სამი დღის შემდეგ სოხუმში ორ ადგილობრივი დაიჭრა ცეცხლსასროლი იარაღით ოჯახური კონფლიქტის დროს.

მეორე დღეს კი სოფელ ლიხნიში იყო სროლა , რა დროსაც, კიდევ ორი ადამიანი დაშავდა.

მედიის ცნობით, 13-დან 17 მარტამდე ოკუპირებული აფხაზეთის სამედიცინო დაწესებულებებში ცეცხლსასროლი იარაღით მიყენებული ჭრილობებით ხუთი ადამიანი გადაიყვანეს. თუმცა, ამ ინციდენტების შესახებ ოფიციალური მონაცემები ან ძალიან ცოტაა, ან საერთოდ არ არსებობს.

მარტის შუა რიცხვებში, რუსეთის საგარეო საქმეთა სამინისტრომ რუსეთის მოქალაქეებს, ოკუპირებულ აფხაზეთში მოგზაურობისგან თავის შეკავების რეკომენდაცია გააუქმა.

2024 წლის ნოემბერში რუსეთის ფედერაციის ეკონომიკური განვითარების სამინისტრომ რეკომენდაცია მისცა, რომ რუს ტურისტებს თავი შეიკავონ აფხაზეთში მოგზაურობისგან,ხოლო ტუროპერეტორებს აფხაზეთში ტურების გაყიდვა აეკრძალათ.

გადაწყვეტილება სოხუმში გამართულ საპროტესტო აქციებს უკავშირდებოდა, რასაც ე.წ. პრეზიდენტის ასლან ბჟანია გადადგომა და რუსეთთან საინვესტიციო შეთანხმების რატიფიცირების ჩაგდება მოჰყვა.