ალბათ ყველას გაგვიგია გამოთქმა „შენ ის ხარ, რასაც ჭამ“ და ვაცნობიერებთ, რომ საკვები პროდუქტები პირდაპირ გავლენას ახდენს ჩვენს ჯანმრთელობაზე. დღეს, სოფლის მეურნეობაში მცენარეთა მავნე ორგანიზმებისგან დასაცავად, ყველაზე გავრცელებულია ქიმიური ნივთიერებების, ე.წ. პესტიციდების გამოყენება. დიდი რაოდენობით პესტიციდები კი ტოქსიკურად მოქმედებს არა მარტო მავნე ორგანიზმებზე, არამედ ადამიანის ჯანმრთელობაზეც.

ელექტრონული პეტიციების პორტალზე, ichange.gov.ge-ზე ატვირთული ერთ-ერთი პეტიცია სახელმწიფოს მხრიდან ამ პრობლემის მოგვარებისთვის ქმედითი ზომების მიღებას ითხოვს. პეტიციის ინიციატორი ტექნიკური უნივერსიტეტის სამეცნიერო ცენტრის მთავარი მეცნიერი, ბიოლოგიურ მეცნიერებათა დოქტორი, ბატონი თენგიზ ჯალიაშვილია. მისი განმარტებით, ამ პეტიციის საჭიროება გამოიწვია იმან, რომ საქართველოს სოფლის მეურნეობაში პრაქტიკულად უგულვებელყოფილია საკვებ პროდუქტებში 29 მიკროელემენტის შემცველობა, რომელთა დეფიციტი იწვევს უამრავ ქრონიკულ დაავადებას. გაეროს მონაცემებით, მსოფლიოში ორ მილიარდ ადამიანს აქვს ანემია, რაც გამოწვეულია საკვებში რკინის ნაკლებობით, ასევე კატასტროფულად იზრდება აუტოიმუნური, ენდოკრინოლოგიური, ნეიროდეგენერაციული დაავადებები, რაც გამოწვეულია საკვებში ცინკის, მაგნიუმის, სელენიუმის, მანგანუმის და სხვა მიკროელემენტების ნაკლებობით.

“სამწუხაროდ, დღევანდელი სოფლის მეურნეობა ორიენტირებულია მხოლოდ მცენარეული მასის ზრდაზე და უგულვებელყოფილია უმთავრესი რამ, რომ პროდუქტი უნდა შეიცავდეს 29 მიკროელემენტს. მხოლოდ და მხოლოდ შეაქვთ აზოტი, ფოსფორი და კალიუმი, იმისათვის, რომ მცენარე გაიზარდოს. ამ დროს მისი საკვები და ფუნქციური ღირებულება კლებულობს.”

ბატონ თენგიზს და მის კოლეგებს სჯერათ, რომ ბიო-პროდუქტების და ნატურალურ საკვებ-დანატების წარმოება-მოხმარების კონცეფციის და მისი განხორციელების ხუთწლიანი პროგრამის დანერგვა, პირველ რიგში შეამცირებს სწორედ ამ ქრონიკულ დაავადებებსა და მათთან დაკავშირებულ სამედიცინო ხარჯებს, რადგან მიკროელემენტებითა და პროვიტამინებით გაცილებით უკეთ გაჯერებული ბიო-პროდუქტები და ნატურალური საკვებ-დანატები ადამიანის ორგანიზმის ნორმალურ ფუნქციონირებას აღადგენს.

„ამ პროგრამის დანერგვა მომგებიანი იქნება ფერმერებისთვისაც, რომელთაც კარგად ესმით, რომ რაც უფრო მეტ ჰუმუს, მიკროორგანიზმებს და ჭიაყელებს შეიცავს ნიადაგი, მით უფრო მძლავრია მცენარის ზრდა-განვითარება და მისი ბიო-პროდუქტის კვებითი ღირებულება უფრო სრულფასოვანია, რაც მესამე საყრდენი, იგივე დედაბოძია ადამიანის ჯანმრთელობისა, სუფთა წყლისა და ჰაერის შემდეგ. საბედნიეროთ, ბიო-პროდუქტებზე მოთხოვნა ყოველწლიურად იზრდება, წარმოება-მიწოდება კი საგრძნობლად ჩამორჩება, ამიტომ ბიო-პროდუქტებზე ფასებმა მკვეთრად აიწია. სწორედ ეს გაუჯერებელი ბაზარი არის „ოქროს შანსი“, ქართველ ბიო-ფერმერებისათვის.

ამ პროგრამის დანერგვით საქართველოს ეძლევა შანში გახდეს ეკოჰაბი და მოიზიდოს არა მარტო ეკოტურისტები, არამედ სოლიდური ინვესტორებიც, რომლებმაც კარგად იციან მსოფლიო ბაზრის მზარდი მოთხოვნა, როგორც ბიო-პროდუქტებზე, ისე მცირე მოცულობისა და მაღალი ღირებულების მქონე ნატურალურ საკვებ დანამატებზე როგორიცაა: პიგმენტები, ეთერ-ზეთები, ზეთები, იმუნო-სტიმულატორები და ა.შ. მათი წარმოება ყველაზე რენტაბელურია ბიო-ფერმერების ჯერ კიდევ გამოუყენებელ ბუნებრივ რესურსებიდან.“

პეტიციის მიზანია ასევე პესტიციდების მავნე მოქმედების შემცირება. დღეს 1000 პესტიციდიდან 650 შემოდის საქართველოში. ამის მონიტორინგი პრაქტიკულად შეუძლებელია. ეს პესტიციდები სინთეტიკურია და მისი გამოყენება აზიანებს ნიადაგსაც, რომელიც ნაციონალური კაპიტალია, იწამლება მიწისქვეშა წყლები, რაც იწვევს მკვდარი ზონების გაჩენას.

„მცდარია შეხდეულება, რომ ბიოწარმოების დანერგვა უფრო ძვირია. დღეს მოყვანილი პროდუქტის თვითღირებულების 60% მოდის სწორედ ამ პესტიციდებსა და სხვა სინტეტურ სასუქზე. ამ დროს ფერმერს შეუძლია კომპოსტირება მოახდინოს და გამოიყენოს სასუქად. ბუნებაში ურთიერთდაბალანსებულია ყველაფერი, რაც უფრო საღია ნიადაგი მით უფრო მძლავრია მცენარე და უფრო ჯანმრთელია ადამიანი, ეს ციკლი დავარღვიეთ ჩვენ. ეს პირდაპირ მოქმედებს ჩვენს ჯანმრთელობაზე.

ზოგს გონია, რომ პესტიციდების აკრძალვა დააქცევს ქვეყნის ეკონომიკას. პირიქით პესტიციდების ჩანაცვლება ბიო დანამატებით იქნება მომგებიანი, როგორც ფერმერისთვის, ასევე სახელმწიფოსთვის და პირველ რიგში ჩვენი და ჩვენი მომავლის ჯანმრთელობისთვის.“

®️