ზუგდიდში, სამხარეო ადმინისტრაციასთან მიმდინარე აქციის მონაწილეებმა ჟურნალისტ გურამ როგავას სოლიდარობა გამოუცხადეს.

"გუშინ ჩვენ ვნახეთ როგორ ბრუტალურად ეპყრობა ხელისუფლება მშვიდობიან დემონსტრანტებს , როგორ არბევს მათ, როგორ სცემს უდანაშაულო მოქალაქეებს, როგორ უსწორდება ჟურნალისტებს, ყველა იმ ადამიანს, ვინც დგას სიმართლის მხარეს. დღეს ხელისუფლება უპირისპირდება ძალადობით, წიწაკის სპრეით, მხუთავი აირით, წყლის ჭავლით, ცემით, თავის გატეხით და ა.შ. მძიმე დაზიანებები აქვს მიღებული ჩვენს თანაქალაქელს, ძალიან კარგ ჟურნალისტს, გურამ როგავას და ჩვენი სოლიდარობა მას, ჩვენი ქალაქიდან, მისი მშობლიური ქალაქიდან ...“, -  მიმართა შეკრებილებს, „საერთაშორისო გამჭვირვალობა - საქართველოს" რეგიონული ოფისის ხელმძღვანელმა, არჩილ თოდუამ.

29 ნოემბერს, „ფორმულას“ ჟურნალისტი, ზუგდიდელი გურამ როგავა, რუსთაველზე მიმდინარე საპროტესტო აქციას პირდაპირ ეთერში აშუქებდა, რა დროსაც თავს დაესხა სპეცრაზმელი და ფიზიკურად გაუსწორდა. ის მძიმე დაზიანებებით საავადმყოფოში გადაიყვანეს, სადაც შესაბამისი მკურნალობა უტარდება.

ამ წუთებში, ზუგდიდში, სამხარეო ადმინისტრაციის წინ აქცია იმართება. მოქალაქეები, სამოქალაქო აქტივისტები და ოპოზიციონერი პოლიტიკოსები, მეორე დღეა იკრიბებიან და „ქართული ოცნების“ გადაწყვეტილებას აპროტესტებენ, ევროკავშირთან 2028 წლამდე მოლაპარაკებების შეჩერების შესახებ.