საკრებულოს თავმჯდომარის მოადგილემ, გიორგი თოდუამ, ბინათმესაკუთრეთა ამხანაგობების თავმჯდომარეებს ამხანაგობების მხარდაჭერის პროგრამის პროექტი წარუდგინა. საკრებულოს პრესსამსახურის ცნობით, თოდუამ შეხვედრის მონაწილეებს ქალაქ ზუგდიდის მუნიციპალიტეტში “ბინათმესაკუთრეთა ამხანაგობების განვითარების ხელშეწყობის პროგრამის განსახორციელებლად გათვალისწინებული თანხების განკარგვისა და ბინათმესაკუთრეთა ამხანაგობების აღრიცხვის წესის” პროექტი გააცნო და მათ შეკითხვებს უპასუხა. შეხვედრაზე ქალაქის საკრებულოს თავმჯდომარის მოადგილემ ამხანაგობების მხარდაჭერის მნიშვნელობასა და აუცილებლობაზე ისაუბრა და დეტალურად ახსნა პროგრამის სხვადასხვა მიმართულება - ადგილობრივ თვითმმართველობასთან ურთიერთობის სამართლებრივი ფორმები და რეგულაციები, ფინანსური თანამონაწილეობის ზომები და ა.შ. შეხვედრაზე, ასევე ისაუბრეს ბინათმესაკუთრეთა ამხანაგობების წინაშე არსებულ გამოწვევებზე. მხარეებმა შეაფასეს არსებული გამოწვევები და მათი გადაჭრის ერთობლივი გზები დასახეს. შეხვედრას ქალაქ ზუგდიდის საკრებულოს ეკონომიკის, ურბანული განვითარებისა და ქონების მართვის საკითხთა კომისიის თავმჯდომარე თენგიზ ქოჩუა, ფრაქცია "ქართული ოცნება - რესპუბლიკელების" თავმჯდომარე ნიკოლოზ ზარქუა, საკრებულოსა და მერიის შესაბამისი სამსახურების წარმომადგენლები, განვითარებისა და დემოკრატიის ცენტრის კოორდინატორი სამეგრელო-ზემო სვანეთის რეგიონში გურამ ჩიხლაძე და მედიის წარმომადგენლები ესწრებოდნენ.