სოხუმში, 12 ნოემბერს, გვიან ღამით ოპოზიციური ძალების წარმომადგენლები დააკავეს, რასაც მათი მხარდამჭერების საპროტესტო აქცია და ავტომაგისტრალის გადაკეტვა მოჰყვა.
ამასთან დაკავშირებით, აფხაზმა ლიდერმა ასლან ბჟანიამ ე.წ. უშიშროების საბჭოს საგანგებო სხდომა მოიწვია, რომელზეც „სახელმწიფო უშიშროების სამსახურის“ ხელმძღვანელმა დიმიტრი ქუჩუბერიამ განაცხადა, რომ ამ სამსახურის შენობის ჭიშკართან „არეულობების დროს დაფიქსირებულია თანამშრომლებზე ფიზიკური ზემოქმედების შემთხვევები“, ერთ-ერთი პირი კი თავისი ავტომანქანით ცდილობდა ჭიშკრის შენგრევას. მისივე თქმით, ამ პირის ვინაობა დადგენილია და დააკავებენ, წერს „ეხო კავკაზა“.

11 ნოემბერს, საღამოს, ტელეგრამის არხებმა გაავრცელეს ცნობები, რომ აფხაზეთში დააკავეს ადგილობრივი ოპოზიციის წარმომადგენლები ომარ სმირი, გარი კოკაია, ალმასხან არძინბა, რამაზ ჯოპუა და ასლან გვარამია. ამავე ინფორმაციით, ისინი ე.წ. უშიშროების სამსახურის შენობაში გადაიყვანეს. მათი ახლობლები და ოპოზიციის წარმომადგენლები ამ შენობასთან შეიკრიბნენ დაკავებულთა გათავისუფლების მოთხოვნით. მოგვიანებით აქციამ სოხუმის თავისუფლების მოედანზე გადაინაცვლა. დაკავებულთა გათავისუფლების მოთხოვნით ოპოზიციის წარმომადგენლებმა და მხარდამჭერებმა გუმისთის და კოდორის ხიდები გადაკეტეს.

აფხაზური ოპოზიციური პარტიის „სახალხო ერთობის ფორუმის“ ლიდერის, ასლან ბარციცის ინფორმაციით, ოპოზიციის აქტივისტები ბრუნდებოდნენ გუდაუთიდან, სადაც საზოგადოების შეკრება ჩატარდა მოსკოვსა და სოხუმს შორის ახლახან ხელმოწერილი „საინვესტიციო საქმიანობის შეთანხმების“ განსახილველად. ეს „შეთანხმება" რუსულ კომპანიებს აძლევს აფხაზეთში თავისი საინვესტიციო პროექტების რეალიზაციის უფლებას.

აფხაზური ოპოზიცია შეთანხმებას ეწინააღმდეგება და მისი რატიფიკაციის დღეს, 15 ნოემბერს, საპროტესტო აქციას გეგმავს.

„კონფლიქტის ცენტრშია აპარტამენტების მშენებლობა და აფხაზეთში 100 ათასი უცხო ქვეყნის მოქალაქის პოტენციური დასახლება. ეს არის სტრატეგიული ობიექტების გაყიდვა და საუკეთესო სანაპირო მიწების უცხოელი ოლიგარქებისთვის გადაცემა, ისეთი ხელშეკრულებების გაფორმება, რომლებიც მსხვილ უცხოურ კაპიტალს გადასახადებისგან გათავისუფლებს. ადგილობრივი ბიზნესი და მთლიანად ეკონომიკა დიდი დარტყმის ქვეშაა.

ამასთან ერთად, პრეზიდენტი, სასწრაფოდ აყენებს განსახილველად კანონპროექტს, რომელიც აუქმებს პრემიერ-მინისტრის პოსტს და მისცემს მას პარლამენტის თავმჯდომარეობის უფლებას, რაც ძალაუფლების აბსოლუტურ დიქტატურად გადაქცევას ნიშნავს“, - წერენ კანონპროექტის მოწინააღმდეგეები ტელეგრამის არხზე RESPUBLICA.

უფრო გვიან, ასევე ტელეგრამის არხით გავრცელდა ოკუპირებული აფხაზეთის ე.წ. გენერალური პროკურორის, ადგურ აგრბას ვიდეომიმართვა, რომელშიც ის ამბობს, რომ დაკავებულია არა ხუთი, არამედ ოთხი პირი: გარი კოკაია, ალმასხან არძინბა, ომარ ხმირი და რამაზ ჯოპუა.

11 ნოემბერს, აფხაზეთის დე ფაქტო რესპუბლიკის „პარლამენტის“ სხდომაზე მეორე მოსმენით დაამტკიცეს კანონპროექტი „მრავალფუნქციური კომპლექსების სამართლებრივი სტატუსის მოწესრიგების შესახებ“ . ტელეგრამის არხების ინფორმაციით, აფხაზური ოპოზიცია ეწინააღმდეგება აღნიშნულ კანონპროექტის ამგვარ განსაზღვრებას და მიიჩნევს, რომ ის რუსეთთან საინვესტიციო შეთანხმების რატიფიცირების წინაპირობაა.

ტელეგრამის არხის RESPUBLICA - ს ცნობით, პარლამენტის შენობასთან ფიზიკური დაპირისპირებაც მოხდა, რა დროსაც დაშავდა „საინვესტიციო ხელშეკრულების რატიფიკაციის მხარდამჭერი ერთ-ერთი დეპუტატი “.

უფრო ადრე, რუსეთთან საინვესტიციო ხელშეკრულების რატიფიცირების მოწინააღმდეგეთა შტაბმა “Апсны Хабар” - მა, ტელეგრამის არხზე დაწერა, რომ დე ფაქტო ხელისუფლება მორიგ ხრიკს ამზადებს აღნიშნული კანონპროექტის დასამტკიცებლად, რისთვისაც ცდილობს ბიჭვინთის „სქემა“ აამოქმედოს.

ცნობისთვის, „აპარტამენტების“ შესახებ კანონპროექტი ოკუპირებული აფხაზეთის პარლამენტმა ივლისში უკან გაიწვია.

ოქტომბრის ბოლოს სოხუმმა ხელი მოაწერა მოსკოვის მიერ მოთხოვნილ კიდევ ერთ შეთანხმებას, რომელიც რუსულ კომპანიებს აფხაზეთში საინვესტიციო პროექტების განხორციელების საშუალებას აძლევს.

დოკუმენტის ძალაში შესვლის პროცედურა ითვალისწინებს ე.წ. პარლამენტში მის სავალდებულო რატიფიცირებას. 

აფხაზური ოპოზიციის ნაწილი ამ დოკუმენტის წინააღმდეგ გამოდის და მიაჩნია, რომ ეს გამოიწვევს "ოლიგარქიის გაფართოებას".

ცნობისთვის, 1 სექტემბრიდან მოსკოვმა შეაჩერა ოკუპირებული აფხაზეთის ბიუჯეტის დაფინანსება, მათ შორის, საინვესტიციო ხელშეკრულების დამტკიცების მოთხოვნით.