აღდგომის დღესასწაულამდე ერთი დღით ადრე იერუსალიმის ძველ ქალაქში, ქრისტეს აღდგომის ტაძარში წმინდა ცეცხლის გადმოსვლის რიტუალი სრულდება.

მთელი მსოფლიოდან ათასობით მართლმადიდებელი ქრისტიანი იკრიბება მაცხოვრის საფლავზე, რათა საკუთარ თავზე გამოცადოს ქრისტიანებისთვის ერთ-ერთი ყველაზე მნიშვნელოვანი რელიგიური ცერემონია.

ათასობით მორწმუნეს შორის, რომელმაც საკუთარი თვალით იხილა წმინდა ცეცხლის გადმოსვლა, ერთ-ერთია ჩვენი რესპონდენტი პაატა კუტალია. ის გვიყვება, რომ იერუსალიმში წასვლა მისი ადრეული ასაკის ოცნება იყო და 2014-2016 წლებში მოახერხა მისი ახდენა. "ვიცოდი, რომ გზად შემხვდებოდა ძალიან ბევრი დაბრკოლება და იქ შესვლა რთული იქნებოდა. ასეც მოხდა. დილით ცოტა დავაგვიანე იქ შესვლა. 8 საათზე რომ მივადექი წმინდა ქალაქს, მანდ უკვე პოლიციელებს გადაკეტილი ჰქონდათ ტერიტორია, ყველა ქუჩა.

ჩემთვის, ფაქტობრივად, იქ შესვლა საშვის გარეშე იყო შეუძლებელი და რაღაცნაირ სასოწარკვეთილებაში ჩავვარდი. ვამბობდი, რომ ამხელა გზა გამოვიარე, ოცნება მქონდა და ღმერთს ვთხოვდი, რამენაირად წმინდა ცეცხლის გარდამოსვლას დავსწრებოდი. თვითგვემაში ვიყავი", - იხსენებს ის.

მან გვიამბო, რომ ამ დღეს პოლიციელებს ქალაქში უსაფრთხოების განსაკუთრებული ზომები აქვთ მიღებული. ისინი აკონტროლებენ მომლოცველთა გადაადგილებას. პაატას თქმით, დაგვიანების მიუხედავად, ერთ-ერთმა პოლიციელმა მის მიმართ გულისხმიერება გამოიჩინა. საბოლოოდ, ამბობს, რომ “ყველანაირი დაბრკოლება გადავლახე და თამამად შევედი იერუსალიმის აღდგომის წმინდა ტაძარში”.

“ყველასთვის ცნობილია, არაბების შესვლა ტაძარში, მათი ყიჟინა, ზარ-ზეიმი, მე ვუძღვებოდი მათ წინ. მათ შემოსვლას განსაკუთრებული მნიშვნელობა აქვს წმინდა ცეცხლის გარდამოსვლამდე. მათ ერთ დროს აუკრძალეს კიდეც ტაძარში შესვლა და დიდი ხანი არ გადმოდიოდა წმინდა ცეცხლი,როდესაც გააღეს მათთვის ეს კარები, მაშინვე გადმოვიდა ცეცხლი", - ჰყვება რესპონდენტი.

რაც შეეხება უშუალოდ წმინდა ცეცხლის გადმოსვლის ემოციებს, პაატა ამბობს, რომ გაოგნებული აკვირდებოდა იმ ქრონოლოგიურ რიტუალს, რომელსაც, მისი თქმით, არაბი მართლმადიდებლები იწყებენ და ისრაელისა და სრულიად პალესტინის პატრიარქის განმოსვით, კუვუკლიიდან წმინდა ცეცხლის გამობრძანებით სრულდება.

"წამებში ქრება ყველა შუქი, ეს იყო წყვდიადი და იდუმალი ემოცია და ეს სიბნელე განასახიერებს ქრისტეს ჯვარცმას.

ამ წყვდიადში ყველა მოლოდინშია წმინდა ცეცხლის გარდამოსვლის, ემოციური ფონია, ყველას კამერა მიმართულია კუვუკლიის კარებთან და წამებში ერთბაშად არის შეძახილები "დიდება უფალს", "ქრისტე აღსდგა" და წამებში ვრცელდება წმინდა ცეცხლი. გარშემომყოფთა სანთლებს წამებში გადაედება ცეცხლი. ამას რომ ჰქონდეს ჩვეულებრივი ცეცხლის თვისება, იქ აუცილებლად მოხდებოდა ინციდენტი. ეს არის ჭეშმარიტად ზეციური ცეცხლი, რომელიც არ წვავს და უდიდეს მადლს, კავშირს ვგრძნობდი უფალთან", - გვეუბნება პაატა.

ის ასევე გვიზიარებს, რომ ადგილზე სხვადასხვა ენაზე მოლაპარაკე ადამიანები ერთმანეთს ქრისტეს აღდგომას ულოცავდნენ. სხვადასხვა ენაზე ნათქვამი ორი სიტყვის კომბინაცია "ქრისტე აღსდგა" ყველა იქ მყოფთათვის გასაგები და მშობლიურია.

მას ხელში ეჭირა ორი კონა სანთელი, თითოეულში 33 ცალი, რაც, როგორც თვითონ გვიხსნის, დაკავშირებული იყო ქრისტეს მიწიერ წლებთან. 10 წუთის შემდგომ კი პოლიციამ მათ სთხოვა სანთლები ჩაექროთ და ტერიტორია დაეტოვებინათ, რათა გარეთ მყოფებსაც შესძლებოდათ ცერემონიაზე დასწრება.

"ეს იყო უდიდესი ემოცია ჩემს ცხოვრებაში. ნამდვილად, ჭეშმარიტად აღსდგა ქრისტე. და რა არის აღდგომა, ეს არის სიმართლის გამარჯვება უსამართლობაზე, სიხარულის გამარჯვება მწუხარებაზე, სიცოცხლის გამარჯვება სიკვდილზე, სიკეთის გამარჯვება ბოროტებაზე", - ეუბნება რადიო "ათინათს" მორწმუნე.

პაატას თქმით, წმინდა ცეცხლის გადმოსვლა არ არის ქრისტეს ჭეშმარიტი აღდგომის დადასტურება მორწმუნეთათვის, რადგან ისინი ნებისმიერ შემთხვევაში ირწმუნებენ მაცხოვრის აღდგომას. მიუხედავად ამისა, გვეუბნება, რომ მისი მოლოდინი გამართლდა და მან მეორედაც მოილოცა იერუსალიმის სხვა წმინდა ადგილები.