მოსკოვი გააგრძელებს სოხუმისთვის სოციალურ - ეკონომიკურ განვითარებაში დახმარებას, ამის შესახებ რუსეთის საგარეო საქმეთა მინისტრმა სერგეი ლავროვმა აფხაზეთის დე ფაქტო რესპუბლიკის საგარეო საქმეთა მინისტრთან სერგეი შამბასთან შეხვედრაზე განაცხადა.

„ ... გაფორმებული შეთანხმებების შესაბამისად აფხაზეთთან თანამშრომლობას გავაგრძელებთ მისი უსაფრთხოების უზრუნველყოფისა და საერთაშორისო პოზიციების განმტკიცებაში“, - თქვა ლავროვმა.

აქვე მან დასძინა, რომ “სპეცოპერაციაში” აფხაზეთი მხარს უჭერს რუსეთს. ლავროვმა ასევე აღნიშნა სირიასა და ნიკარაგუაში რუსეთისა და აფხაზეთის დიპლომატიურ მისიებს შორის ყოველდღიური თანამშრომლობის შესახებ.

„პრინციპული პოზიცია გვაქვს ჟენევაში სამხრეთ კავკასიის უსაფრთხოებისადმი მიძღვნილ დისკუსიებში და ხელს ვუწყობთ ხელშეკრულების გაფორმების საკითხის წამოწევას, რომელიც საიმედოდ დაიცავს უსაფრთხოებას, სტაბილურობას ამ რეგიონში რეალობის აღიარების საფუძველზე, აფხაზეთისა და სამხრეთ ოსეთის დამოუკიდებლობის ჩათვლით“, - თქვა მან.

სერგეი ლავროვმა „ეკონომიკურ საქმეებზე სასამართლო და საარბიტრაჟო გადაწყვეტილებების აღიარებისა და აღსრულების შესახებ“ აფხაზეთის დე ფაქტო პარლამენტის მიერ რატიფიცირებულ დოკუმენტზე საუბრისას იმედი გამოთქვა, რომ სხვა, სამუშაო პროცესში მყოფი დოკუმენტებიც ოპერატიულად იქნება შეთანხმებული.  1 სექტემბრიდან რუსეთმა შეაჩერა ოკუპირებული აფხაზეთის ბიუჯეტის დაფინანსება, მათ მიერ წაყენებული პირობების შესრულებამდე.

მანამდე, ქართული ოცნების“ გენერალური მდივანმა და თბილისის მერმა კახა კალაძემ 29 სექტემბერს განაცხადა, რომ ხელისუფლება პოზიტიურად აფასებს რუსეთის საგარეო საქმეთა მინისტრის სერგეი ლავროვის განცხადებას. 

კალაძის განცხადებას სოხუმში გამოეხმაურნენ და თბილისს მოსკოვთან ურთიერთობების დალაგებისკენ მოუწოდებენ.

რუსეთი არ გაიყვანს ჯარებს ოკუპირებული აფხაზეთიდან და სამხრეთ ოსეთიდან და არ განიხილავს საქართველოსთვის მათ დაბრუნებას. ამის შესახებ რუსეთის სახელმწიფო დუმის დსთ-ს, ევრაზიული ინტეგრაციისა და თანამემამულეებთან ურთიერთობის კომიტეტის თავმჯდომარის პირველმა მოადგილემ კონსტანტინ ზატულინმა განაცხადა, რითაც ლავროვის განცხადებას გამოეხმურა.

დღეს, 4 ოქტომბერს, ლავროვი ასევე შეხვდა ე.წ. სამხრეთ ოსეთის "საგარეო უწყების ხელმძღვანელს". შეხვედრის შემდეგ გამოქვეყნებულ განცხადებაში ნათქვამია, რომ რუსეთის ხელისუფლების მიერ 2008 წლიდან მიღებული გადაწყვეტილება „აფხაზეთისა და სამხრეთ ოსეთის დამოუკიდებლობის ცნობის შესახებ, არ გადაიხედება“.

საქართველოს აფხაზეთისა და ცხინვალის რეგიონები რუსეთმა 2008 წლის აგვისტოს ომის შემდეგ დამოუკიდებელ ქვეყნებად აღიარა, იმავე წლის სექტემბერში ნიკარაგუამ ცნო აფხაზეთის დამოუკიდებლობა, 2009 კი ვენესუელამ და ნაურუმ, ხოლო 2018 წელს - სირიამ.