5 თებერვალს სახალხო დამცველმა იანვრის თვეში აპარატის საქმიანობის ანგარიშთან დაკავშირებით პრესკონფერენცია გამართა. აპარატის საქმიანობის მეტი გამჭვირვალობისა და საზოგადოებასთან უფრო მჭიდრო ურთიერთობის მიზნით, სახალხო დამცველი ჟურნალისტებს ყოველი თვის დასაწყისში შეხვდება. საქართველოს სახალხო დამცველმა პრესკონფერენცია ხუდონჰესის თემით დაიწყო და გამოეხმაურა საქართველოს ენერგეტიკის მინისტრის კახი კალაძის გუშინდელ განცხადებას, სადაც მან სახალხო დამცველი სიცრუის გავრცელებაში დაადანაშაულა. უჩა ნანუაშვილმა აღნიშნა, რომ როგორც ჩანს, მინისტრს არ აქვს კომუნიკაცია თავის აპარატთან, და შესაბამისად არ იცის, რომ ადგილობრივ მოსახლეობასთან შეხვედრის თხოვნაზე, სახალხო დამცველს სამინისტროდანაც და ინვესტორი კომპანიიდანაც უარი უთხრეს. პრესკონფერენციაზე სახალხო დამცველმა ოცამდე კითხვას გასცა პასუხი. ჟურნალისტებს აინტერესებდათ ომბუდსმენის პოზიცია „პატიმრობის კოდექსში შესატან ცვლილებებთან“ დაკავშირებით; ეკომიგრანტების მდგომარეობა; ლაფანყურის საბჭოს საქმიანობის ეტაპები; პატიმართა წამების ფაქტების გამოძიების მიმდინარეობა; ასევე, სასჯელაღსრულებისა და პრობაციის სამინისტროსადმი გაგზავნილი რეკომენდაციები; უმცირესობებისადმი დამოკიდებულებაზე საუბრისას, სახალხო დამცველი ფიქრობს, რომ შეუწყნარებლობის თითოეული ფაქტი საზოგადოების სამსჯელო საგანი უნდა გახდეს. http://www.ombudsman.ge/index.php?page=1001&lang=0&id=1922