პარლამენტის ადამიანის უფლებათა დაცვის კომიტეტი სახალხო დამცველის ანგარიშის განხილვას იწყებს. დოკუმენტი, რომელიც ომბუდსმენმა კანონმდებლებს განსახილველად აპრილის დასაწყისში წარუდგინა, საკომიტეტო სხდომაზე დღეს გავა. კომიტეტის თავმჯდომარის ეკა ბესელიას განცხადებით, ანგარიშს მთავრობის წარმომადგენლებთან ერთად განიხილავენ. იმავდროულად კომიტეტი მთავრობისგან ითხოვს პასუხებს, გასული წლის ანგარიშის საფუძველზე მიცემული რეკომენდაციების შესრულებასთან დაკავშირებით. მომზადდება ახალი რეკომენდაციებიც. პარლამენტში წარდგენილი სახალხო დამცველის ანგარიში ადამიანის უფლებათა დაცვის კუთხით ქვეყანაში 2013 წელს არსებულ მდგომარეობას ასახავს. 2013 წელს სახალხო დამცველის ოფისს 11 ათასზე მეტმა პირმა მიმართა, რაც როგორც ომბუდსმენი აღნიშნავს, წინა წლებთან შედარებით გაორმაგებული მაჩვენებელია და ოფისისადმი გაზრდილ მოლოდინებზე, დარღვეული უფლებების შესახებ საზოგადოების ცნობიერების ამაღლებასა და ქვეყანაში თავისუფალი გარემოს არსებობაზე მეტყველებს. დოკუმენტის მიხედვით, 2013 წლის განმავლობაში ადამიანის უფლებათა დაცვის სფეროში ერთ-ერთ ყველაზე მნიშვნელოვან მიღწევად სისხლის სამართლის პოლიტიკის ლიბერალიზაცია ფასდება, რაც წლების განმავლობაში სახალხო დამცველის არაერთი რეკომენდაციის საგანს წარმოადგენდა, თუმცა მეორე მხრივ, როგორც სახალხო დამცველი აღნიშნავს, მთელი სიმწვავით წამოიწია სხვადასხვა ჯგუფების მიმართ შეუწყნარებლობის აქტიურმა გამოვლინებამ, რასაც ცალკეულ შემთხვევებში, ადეკვატური რეაგირება არ მოჰყოლია. სახალხო დამცველმა კანონდარღვევად შეაფასა 2013 წლის ივნისში მერიისა და საკრებულოს თანამშრომელთა დაკავება ფინანსთა სამინისტროს საგამოძიებო სამსახურის მიერ და მიიჩნია, რომ აღნიშნულ ფაქტზე აუცილებელია გამოძიების ჩატარება. მისივე შეფასებით, კანონის მოთხოვნათა სავარაუდო დარღვევის შესახებ ლეგიტიმური კითხვები რჩება ე.წ. "ტრაქტორების საქმეზე".