მნიშვნელოვანი არქეოლოგიური აღმოჩენა მცხეთაში
4 აგვისტოს მცხეთას საქართველოს კულტურისა და ძეგლთა დაცვის მინისტრი მიხეილ გიორგაძე და კულტურული მემკვიდრეობის დაცვის ეროვნული სააგენტოს გენერალური დირექტორი ნიკა ანთიძე ეწვივნენ.
მცხეთაში, ფიქრის გორაზე, კერძო მესაკუთრის ნაკვეთში სამშენებლო სამუშაოებისას აღმოჩენილი სამარხების არქეოლოგიური კვლევისას არქეოლოგები უნიკალურ მასალას წააწყდნენ.
აღმოჩენილია ოქროს საკიდები, ბეჭდები, საკინძები და ბიზანტიის იმპერატორ კონსტანტინე VIII-ს (1025-1028 წწ.) ოქროს მონეტა, რომელიც ადასტურებს, რომ ფიქრის გორის სამაროვანზე მცხეთის მოსახლეობას არა მარტო IV-VI, არამედ - შუა საუკუნეებშიც კრძალავდნენ.
საქართველოს კულტურისა და ძეგლთა დაცვის სამინისტრო კულტურული მემკვიდრეობის დაცვის ეროვნული სააგენტოსთან ერთად განიხილავს საკითხს, რომ მოპოვებულ არტეფაქტებს მოძრავი ძეგლის სტატუსი მიენიჭოს. ფართო საზოგადოება უახლეს მონაპოვარს შემოდგომაზე თბილისში იხილავს. აგვისტოს ბოლომდე გადაწყდება და დადასტურდება, თუ რომელ სივრცეში გამოიფინება ახალი მასალები. საბოლოოდ კი, აღნიშნული ნივთები ექსპონირებული იქნება მცხეთის ახალ მუზეუმში.
საქართველოს კულტურისა და ძეგლთა დაცვის მინისტრმა კულტურული მემკვიდრეობის დაცვის ეროვნული სააგენტოს გენერალურ დირექტორ ნიკა ანთიძესთან ერთად განიხილა მცხეთის არქეოლოგიური მუზეუმ-ნაკრძალის საკითხი, რომლის პროექტიც წლის ბოლომდე დასრულდება. აღმოჩენილი არქეოლოგიური მასალა სამომავლოდ აღნიშნულ მუზეუმში განთავსდება.
უნიკალური სამარხი 2014 წლის ივლისში მცხეთაში, კერძო მესაკუთრის ნაკვეთში სამშენებლო სამუშაოების მიმდინარეობისას გამოჩნდა. კანონის გათვალისწინებით, სამუშაოები შეჩერდა და ტერიტორიის შესწავლას არქეოლოგები შეუდგნენ.
მათ საკვლევ ტერიტორიაზე შეისწავლეს ადრეული შუა საუკუნეების სამაროვანი, სადაც ხუთი ტიპის სამარხი გამოიკვეთა: ორმოსამარხი, თიხის ფილასამარხი, ქვატეხილებითა და ქვიშაქვის ფილებით ნაგები სამარხი, ქვის კვადრებით ნაგები სამარხი და ქვის ფილებით შედგენილი სამარხები. აქ უმნიშვნელოვანესი სწორედ ქვასამარხებია. აქ გვხვდება როგორც საოჯახო, ასევე - ინდივიდუალური სამარხები და მიცვალებულები უმეტესად ქრისტიანული წესით არიან დაკრძალული. სამარხების არტეფაქტები ტიპურია იმ მასალებისა, რომელიც მცხეთის სხვადასხვა სამაროვანზე სხვადასხვა პერიოდშია გამოვლენილი. კერძო მესაკუთრის ნაკვეთში ახალაღმოჩენილი ოქროს ნივთების გარდა, ასევე, ნაპოვნია საკინძები, ფიბულები, სანელსაცხებლეები და სხვადასხვა მასალით დამზადებული ბეჭდები და მძივები.
მასალის გამოყენების პირობები