საბერიო-ფახულანის  ადმინისტრაციულ საზღვარზე  დღეს, 10 დეკემბერი  რუსმა მესაზღვრეებმა ფახულანის #1 საჯარო სკოლის ორი  მოსწავლე  დააკავეს. როგორც წალენჯიხის რესურსცენტრის ხელმძღვანელმა ლირა ღურწკაიამ რადიო“ათინათს“ განუცხადა, ფახულანის #1 საჯარო სკოლის ორი მეთერთმეტე კლასელი, ბიძაშვილები: დათო და ზაზა ახალაიები ამ დილით სკოლაში არ გამოცხადდნენ, როგორც გაირკვა, მოსწავლეები გზად რუსმა სამხედროებმა აიყვანეს. “დამიკავშირდა ერთ-ერთი მოსწავლის მშობელი ტელეფონით, სწორედ მან მაცნობა ეს ამბავი, როგორც მოგვიანებით გაირკვა, ორივე მოსწავლე გადაყვანილია სოფელ ლეკუხონას შტაბში, მოგვიანებით მოსწავლის მამამ მოახერხა შვილის მონახულება“, -აცხადებს ლირა ღურწკაია. როგორც ფახულანის # 1 საჯარო სკოლის დირექტორი ხათუნა ფიფია აცხადებს, რუსმა მესაზღვრეებმა მოსწავლეების მშობლებს მოსთხოვეს დაბადების მოწმობა და პასპორტი. სკოლის დირექტორი არ ფლობს ინფორმაციას, თუ როდის მოხდება მოსწავლეების გათავისუფლება. წალენჯიხის რესურსცენტრის ხელმძღვანელის ლირა ღურწკაიას თქმით, ამ დილით მომხდარ ინციდენტთან დაკავშირებით  საქართველოს განათლებისა და მეცნიერების სამინისტრო საქმის კურსშია.  ცნობისთვის, წალენჯიხის მუნიციპალიტეტის სოფელი ფახულანი ოკუპირებული გალის რაიონ სოფელ საბერიოს ესაზღვრება.