ზედაეწერის მოსახლეობა სასმელი წყლის დაწმენდას ითხოვს
სოფელ ზედაეწერის მოსახლეობა სოფლის ცენტრში, სასმელი წყლის დაწმენდასა და წყლის ავარიული მილების შეცვლის მოთხოვნით შეიკრიბა. ადგილობრივი ანზორ ქარაია ყვება, რომ მან რამდენიმე დღის წინ სასმელი წყლის მთავარ მილში მკვდარი ცხოველი იპოვა, რომელიც გახრწნის პროცესში იყო. მოსახლეობის თქმით ეს უკვე მერამდენე შემთხვევაა როცა წყალს ქვეწარმავალი ან ცხოველის გახრწნილი ნაწილები მოყვება, მათი თქმით დაბინძურებულმა წყალმა ადგილობრივები რამდენჯერმე მოწამლა. მოსახლეობა აცხადებს, რომ დღეს დილით მათთან გაერთიანებული წყალმომარაგების კომპანიიდან მივიდნენ და წყლის დაქლორვა მოახდინეს, თუმცა მათი თქმით ეს საკმარისი არაა, ადგილობრივები 800 მეტრის მონაკვეთზე ავარიული წყლის მილების შეცვალასაც ითხოვენ. გაერთიანებული წყალმომარაგების კომპანიის ზუგდიდის ოფისში აცხადებენ, რომ ამ პრობლემის შესახებ მათთვის ცნობილია. საქართველოს გაერთიანებული წყალმომარაგების კომპანიის ზუგდიდის სერვისცენტრის ხელმძღვანელი, დავით ფოცხვერია აცხადებს, რომ წყალს ქიმიური ანალიზი ჩაუტარდება და მისი ვარგისიანობა შემოწმდება, მისივე თქმით დაზიანებული მილების საკითხიც იქნება შესწავლილი და მისი შეცვლაც უახლოეს პერიოდში მოხდება. ზედაეწერის მოსახლეობა პრობლემის მოგვარების მოლოდინშია, მათი თქმით წინააღმდეგ შემთხვევაში ადგილობრივები სასმელი წყლის გარეშე დარჩება.
მასალის გამოყენების პირობები