ახალი თვითმმართველობის კოდექსის თანახმად, ზუგდიდის მუნიციპალიტეტის ტერიტორიული ოპტიმიზაციასთან დაკავშირებით  გამგეობის სააქტო დარბაზში შეხვედრა გაიმართა. დისკუსიაში მონაწილეობდნენ, როგორც ადგილობრივი ხელისუფლებისა და ტერიტორიული ორგანოს წარმომადგენლები, ასევე  არასამთავრობო ორგანიზაციები: ასოციაცია „ათინათი“,  „საერთაშორისო გამჭვირვალობა-საქართველო“ და  „სამოქალაქო კვლევებისა და მონიტორინგის ცენტრი“. შეხვედრაზე ძირითადად ორი საკითხი, მუნიციპალიტეტების ადმინისტრაციული მოწყობა და ფისკალური დეცენტრალიზაცია განიხილეს. აღნიშნულ საკითხებზე სოფლის რწმუნებულებმა  არაერთგვაროვანი პოზიციები დააფიქსირეს. შეხვედრის მონაწილეების უმრავლესობა თვითმმართველობის ახალ კოდექსს, მთლიანობაში, დადებითად აფასებს, თუმცა ამასთან, იყო შეკითხვები და განსხვავებული მოსაზრებები. „ვეთანხმები მოსაზრებას, რომ ზუგდიდის მუნიციპალიტეტი უნდა დაიყოს ქალაქად და რაიონად, რომელსაც ეყოლება არჩეული მერი და არჩეული გამგებელი. თუმცა კატეგორიულად არ ვეთანხმები, თვითონ მუნიციპალიტეტის რამდენიმე რაიონად დაყოფას“, უთხრა რადიო ათინათს“ რიყის ტერიტორიული ორგანოს რწმუნებულმა ვახტანგ გოგიამ. ზუგდიდის მუნიციპალიტეტის გამგეობის შემოსავლების სამსახურის უფროსის მაიზერ ნანავას მოსაზრებით, ამ ეტაპზე საქართველოში ადგილობრივ თვითმმართველობაში დაგეგმილი რეფორმები ნაადრევია, რადგან, მისვე განმარტებით, რეფორმა დამატებით ხარჯებს მოითხოვს. „თუ ზუგდიდი პატარა მუნიციპალიტეტებად დაიყოფა, მას ფაქტობრივად ადგილობრივი შემოსავლები არ ექნება და ისევ ცენტრზე იქნება დამოკიდებული. სოფლის მოსახლეობის შემოსავალი ბიუჯეტს კი არა ოჯახს ვერ არჩენს“- ამბობს მაიზერ ნანავა. დისკუსია სამოქალაქო საზოგადოების რეგიონალური ქსელის R - CSN  მიერ დაგეგმილი შეხვედრების ფარგლებში ჩატარდა. მსგავსი შეხვედრების  საქართველოს სხვადასხვა დიდ ქალაქებშიც გაიმართება.   )