გაუპატიურების მცდელობაში ბრალდებულ გოგა ანჩაბაძის სასამართლო პროცესები დღეიდან ნაწილობრივ დახურული იქნება. მოსამართლე ნატრული აკობიამ სხდომების დახურვის გადაწყვეტილება ბრალდების მხარის, პროკურორ მირანდა წერეთლის შუამდგომლობის საფუძველზე მიიღო. პროკურატურამ სხდომის დახურვა დაზარალებულად მიჩნეული ანა ძაპტაშვილის ინტერესების გათვალისწინებით მოითხოვა, რადგან მათი განმარტებით ძაპტაშვილის და ბრალდებულ ანჩაბაძის დაკითხვის დროს სქესობრივი ძალმომრეობის მცდელობის დეტალებზე იქნება საუბარი, ბრალდების მხარემ დაყენებული შუამდგომლობა საქართველოს სისხლის სამართლის კოდექსის 182-ე მუხლით გაამყარა. დღეს გამართულ სხდომაზე ბრალდებისა და დაცვის მხარეებმა თავიანთი შესავალი სიტყვა წარმოთქვეს. ბრალდების მხარემ საქმის ფაქტობრივ გარემოებეზე ისაუბრა და დეტალურად მოყვა პროკურატურის ვერსია 2013 წლის 10 ნოემბერს ბრალდებულსა და დაზარალებულს შორის მომხადი ინციდენტის შესახებ. ბრალდების მხარე ამტკიცებს რომ ანჩაბაძემ ძაბტაშვილი ყოფილი პოლიტექნიკუმის ეზოში შეიყვანა და მისი გაუპატიურება სცადა. ჩანაფიქრის სისრულეში მოყვანაში ანჩაბაძეს ხელი აღნიშნულ ტერიტორიაზე ჩასახლებულმა დევნილებმა შეუშალეს. პროკურატურას სამეზე 16 მოწმე ჰყავს დასაკითხი. თავის მხრივ საქმეში არსებულ უზუსტობებზე და ხარვეზებზე საუბრობს დაცვის მხარე. ადვოკატ ალექსანდრე თათელიშვილის თქმით არ არსებობს არანაირი მტკიცებულება იმისა, რომ გოგა ანჩაბაძემ დანაშაული ჩაიდინა. ხოლო ბრალდების მოწმეები კი ცრუ მოწმეებად მოიხსენია. „ეს არის შეთითხნილი ბრალდება და ბუნებრივია ამას დავადასტურებთ, ჩვენ ბრალდების მხარეს ვთხოვთ ამოიღოს შემთხვევის ადგილის მიმდებარე ტერიტორიიდან, პრეზიდენტის რეზიდენციასთან არსებული ვიდეო თვალების ჩანაწერი, ეს სიცხადეს შესძენს საქმეს“, - აღნიშნა თათელიშვილმა. ასევე დღევანდელ სხდომაზე თათელიშვილმა სასამართლოს და ბრალდების მხარეს რამდენიმე დამატებითი მტკიცებულება წარუდგინა. შეგახსენებთ, რომ გოგა ანჩაბაძეს მეგობრის ცოლის, ანა ძაპტაშვილის გაუპატიურების მცდელობისთვის მისმა ქმარმა კონსტანტინე გულორდავამ სცემა და მრავლობითი დაზიანებები 12 ნოემბერს მიაყენა. მკურნალობის კურსს ანჩაბაძე ჯერ ზუგდიდში, შემდეგ კი ქუთაისის კლინიკურ საავადმყოფოში გადიოდა. სამართალდამცავებმა იგი 2013 წლის 20 დეკემბერს დააკავეს. შემდეგი სასამართლო სხდომა საქმეზე მიმდინარე წლის 27 მარტს ჩაინიშნა.