საქართველოს პრემიერ-მინისტრი ირაკლი ღარიბაშვილი სენაკში თავდაცვის სამინისტროს მეორე ბრიგადაში იმყოფებოდა. პრემიერ-მინისტრს სენაკის სამხედრო ბაზაში მასპინძლობას თავდაცვის მინისტრი ირაკლი ალასანია უწევდა. "დღეს სენაკში მეორე ქვეით ბრიგადას ეწვია პრემიერ-მინისტრი. შეამოწმა საბრძოლო მზადყოფნა, გაეცნო ინფრასტრუქტურას, იმ ცვლილებებს, რაც ერთი წლის განმავლობაში აქ განხორციელდა, მოისმინა ბრიგადის განვითარების გეგმა, ასევე მისი მონაწილეობა საერთაშორისო ოპერაციებში. შეფასებები ძალიან მაღალია. მთავარი, რომ პრემიერი ინფრასტრუქტურული განვითარების ხელშეწყობას დაპირდა ბრიგადას. დღევანდელი დღით ჩვენი ჯარისკაცები, მთელი პირადი შემადგენლობა ბედნიერი არიან, რადგან ასეთი მხარდაჭერა არსებობს მთავრობის თავმჯდომარისგან", - განაცხადა ირაკლი ალასანიამ. ქვეყნის პრემიერმა ირაკლი ღარიბაშვილმა ყვავილებით შეამკო სამხედრო ბაზის ტერიტორიაზე არსებული დაღუპულ გმირთა მემორიალი,დაათვალიერა ყაზარმები და პირადად გაეცნო ჯარისკაცების საცხოვრებელ პირობებს. საქართველოს პრემიერ-მინისტრმა ირაკლი ღარიბაშვილმა რეგიონებში ტურნე დღეს დაიწყო. მთავრობის მეთაური 2-3 აპრილს სამეგრელოსა და აჭარას ესტუმრება.