წალენჯიხის მუნიციპალიტეტისგან ქალაქ ჯვარის გამოყოფასა და ცალკე თვითმმართველი ერთეულის შექმნის მოთხოვნით დღეს, 5 აპრილს ჯვარის ცენტრში ასობით ადამინიანი შეიკრიბა. აქციის მონაწილეების თქმით, მათ  სხვადასხვა საკითხების მოსაგვარებლად წალენჯიხის მუნიციპალიტეტში ჩასვლა უწევთ, რის გამოც ხშირად რიგი პრობლემები ექმნებათ. ისინი აცხადებენ, რომ ადგილობრივი ხელისუფლება მუნიციპალიტეტის ბიუჯეტიდან,  ჯვარის პრობლემების მოსაგვარებლად გაცილებით ნაკლებ თანხას ხარჯავს, ვიდრე წალენჯიხისთვის. „ავადმყოფი ქალი ვარ, წალენჯიხაში, რომ წავალ უკან ვერ ვბრუნდები. ამით ძალიან უკმაყოფილო ვარ. თან ხშირად საბუთების მოწესრიგება გვჭირდება, ეს ხომ შეიძლება აქ, ჩვენთან მოხდეს“, - უთხრა რადიო „ათინათს“ ჯვარის მკვიდრმა ქეთევან ზარქუამ. „მაპატიოს ჩემმა მშობლიურმა წალენჯიხამ, მაპატიოს ჩემმა წალენჯიხელმა მეგობრებმა, მაგრამ ეს საკითხი დადებითად თუ გადაწყდა ორივე თემისთვის იქნება სანიმუშო. მთავრობა ხალხთან ახლოს უნდა იყოს, ამიტომ ვითხოვთ ამას“, - ამბობს ზამირ შონია. ჯვარის ცალკე მუნიციპალიტეტის ჩამოყალიბების მოთხოვნით, ჯვარსა და მიმდებარე სოფლებში  12 ათასამდე ხელმოწერა შეგროვდა. პეტიციის ერთ-ერთი ხელმომწერი და საკრებულოს წევრი დავით ჭიჭინაძე აცხადებს, რომ  აღნიშნული პეტიციით,  ჯვარის მოსახლეობამ საქართველოს მთავრობას გასული წლის ნოემბერში მიმართა. ჭიჭინაძის განმარტებით, ქალაქ ჯვარს, ცალკე მუნიციპალიტეტად ჩამოყალიბებისთვის, ყველა საჭირო ინფრასტუქტურა გააჩნია და მისივე თქმით, აქედან გამომდინარე  2014 წლის თვითმმართველობის არჩევნებამდე, გადაწყვეტილების მიღება მარტივია. ის საქართველოს მთავრობას გადაწყვეტილების მიღებისკენ მოუწოდებს. როგორც დავით ჭიჭინაძე განმარტავს, იმ შემთხვევაში თუ მათი მოთხოვნა გათვალისწინებული იქნება „ჯვარის მუნიციპალიტეტში“  ენგურის ხეობის 9 თემი  (ლია, ფახულანი, ჭალე, ეწერი, ჩქვალერი, მუჟავა) შევა. ამასთან, მისივე თქმით, ჯვარის ტერიტორიაზე დარჩება ენგურჰესის საწარმოების ის ნაწილი, რომელიც, ეკონომიურ დოვლათს ქმნის.