საქართველოს რეგიონებში და მათ შორის დედაქლაქშიც ცოფის ინფექციის საშიშროება დღემდე პრობლემად რჩება. წელს, ოთხი თვის განმავლობაში ანტირაბიული დახმარებისთვის ქვეყნის მასშტაბით სამედიცინო დაწესებულებებს 12 577 დაზარალებულმა მიაკითხა. მათ შორის 15 წლამდე ასაკის - 3954-მა მოზარდმა, - ამის შესახებ ინფორმაციას დაავადებათა კონტროლის ეროვნული ცენტრი გვაწვდის. სტატისტიკური მონაცემების მიხედვით, მესამე ადგილს, სამეგრელო იკავებს. კერძოდ, ცოფის საწინააღმდეგო ვაქცინის ჩასატარებლად ანტირაბიულ კაბინეტს 1562-მა დაზარალებულმა მიაკითხა, მათ შორის 15 წლამდე ასაკის 434-მა მოზარდმა. სამეგრელო- ზემო სვანეთის ჯანდაცვის სამსახურის დირექტორი ნანა ოდიშარია რადიო „ათინათთან“ საუბარში განმარტავს, რომ წინა წელს ცოფის დიაგნოზის არც ერთი შემთხვევა არ დაფიქსირებულა , 2012 წელს - 47 წლის მამაკაცი გარდაიცვალა, რომელსაც ანტირაბიული დახმარებისთვის არც ერთხელ არ მიუმართავს . „ 2014 წელს, ზუგდიდის რაიონ სოფელ ცაიშში ცოფის დიაგნოზით შუახნის ქალბატონი გარდაიცვალა. 2013 წლის, ივლისის თვეში მეზობლის ძაღლმა ქალბატონი დაკბინა, რის შემდეგაც მეოთხე დღეს ძაღლი დაიკარგა.“ამბობს ოდიშარია. მისივე განმარტებით,ანტირაბიული მომსახურება 5 ინექციას ექვემდებარება, ქალბატონმა კი მხოლოდ 4 მკურნალობის კურსი ჩაიტარა. 2014 წლის აპრილში კი მას ცოფის კლინიკური ნიშნები აღენიშნებოდა,რის შემდეგაც ის სამკურნალოდ თბილისში გადაიყვანეს , სადაც მას საბოლოო დიაგნოზი ჰიდროფობია დაუმტკიცდა. ნანა ოდიშარიას განცხადებით, ინკუბაციის პერიოდი ცოფის ვირუსს დაახლოებით ერთი წელი აქვს. ცნობისთვის:ზუგდიდში ყოველწლიურად ანტირაბიულ კაბინეტს დახმარებისთვის დაახლოებით ორიათას ექვსასიდან- ორიათას რვაასამდე პაციენტი მიმართავს. ვაქცინაციის წარმოებაზე ზედამხედველობას კი, ვეტერინალური სამსახური და საზოგადოებრივი ჯანდაცვის ცენტრი ახორციელებს.ნანა ოდიშარიას თქმით, მიმდინარე წლის განმავლობაში სულ ოთხი შემთხვევა დაფიქსირდა, როდესაც ცოფის ვირუსით დაავადებულმა პაციენტებმა მკურნალობის სრული კურსის ჩატარებაზე უარი თქვეს, დანარჩენმა 150 -მა პაციენტმა, კი ექიმების გადმობირებით მკურნალობა გააგრძელეს. ცოფზე აცრების მხრივ საქართველო მსოფლიოში პირველ ადგილზეა, ხოლო ცოფის შემთხვევების რაოდენობით – მესამე-მეოთხე ადგილზე, – ამის შესახებ საქართველოს ჯანდაცვის მინისტრმა დავით სერგეენკომ განაცხადა. “ცოფზე აცრების, ანუ დაკბენის შემდეგ აცრების მხრივ მსოფლიოში პირველ ადგილზე ვართ. ცოფის შემთხვევების მხრივ კი, საქართველო მსოფლიოში მესამე-მეოთხე ადგილზეა”, – განაცხადა მინისტრმა. მინისტრის ინფორმაციით, დაკბენების 80 პროცენტი შინაურ ცხოველებზე მოდის და არა გარეულზე. მან აღნიშნა, რომ ეს საშინელი პრობლემაა და ცოფთან დაკავშირებით უკვე დაწყებულია კამპანია, რომელიც მრავალმიმართულებიანი იქნება.