საარჩევნო ბლოკი „არასაპარლამენტო ოპოზიცია - კუკავა, ჩიხრაძე“, კოალიცია „ქართული ოცნების“ ზუგდიდის საარჩევნო შტაბს ადმინისტრაციული რესურსის გამოყენებასა და მოქალაქეების მოსყიდვაში ადანაშაულებს.არასაპარლამენტო ოპოზიციის მაჟორიტარი დეპუტატობის კანდიდატის ბეჟან გუნავას განმარტებით, „ქართული ოცნების“ ზუგდიდის საარჩევნო შტაბის ხელმძღვანელები, უბნის კოორდინატორებს ავალებენ იმ პირთა სიის მოძიებას,რომლებსაც საოციალური დახმარების აღდგენა და ჯარში გაწვევის გადავადება სურთ. მისივე თქმით, „ქართული ოცნების“ წარმომადგენლები, ამ ადამიანებს დახმარებას, ხმის მიცემის სანაცვლოდ პირდებიან. „ჩვენ მივმართავთ უწყებათაშორის კომისიას დაინტერესდნენ ამ საკითხით და მისცენ ამ ფაქტს შესაბამისი რეაგირება. აგრეთვე,მივმართავთ იმ ადამიანებს, რომლებსაც უკანონოდ ჩამოართვეს სოციალური დახმარება, მოგვაკითხონ ჩვენ, რათა კანონის შესაბამისად აღუდგეთ მათ სოციალური დახმარება". -განაცხადა დღეს გამართულ ბრიფინგზე „არასაპარლამენტო ოპოზიციის“ მაჟორიტარი დეპუტატობის კანდიდატმა ბეჟან გუნავამ. ამასთან, ბეჟან გუნავამ ჟურნალისტებს წარუდგინა ფურცელი, სადაც ზემოაღნიშნული მოთხოვნები და დედლაინის დრო - 9 მაისი იყო ჩანიშნული. საარჩევნო ბლოკი „არასაპარლამენტო ოპოზიცია - კუკავა, ჩიხრაძის“ ზუგდიდის გამგებლობის კანდიდატის ოთარ ჭითანავას თქმით, ჯარში გაწვევის გადავადების დაპირება, არა მხოლოდ მოქალაქეების მოსყიდვაა, არამედ მისივე განცხადებით, სერიოზულ დარტყმას აყენებს ეროვნულ უსაფრთხოებას. „როცა მეზობელ ქვეყანაში ასეთი დაძაბულობაა, ჩვენ აქ, წვევამდელებს ჯარში გაწვევას ვუვადებთ, ჩემი აზრით, სერიოზული პრობლემაა“, - აღნიშნა ოთარ ჭითანავამ. კოალიცია „ქართული ოცნების“ ზუგდიდის საარჩევნო შტაბში „არასაპარლამენტო ოპოზიციის“ ბრალდებებს აბსურდულს უწოდებენ და აცხადებენ, რომ მათ საარჩევნო შტაბში მსგავს თემებზე საუბარი არ ყოფილა. „მსგავსი განცხადებების გაკეთება ბეჟან გუნავასგან არ მიკვირს. მიკვირს ოთარ ჭითანავასი, მსგავის რაღაცეები მას არ ეკადრება. რაც შეეხება გუნავას, ეს მისი სტილია, ისინი ასე მოქმედებდნენ და ახლა გონიათ ჩვენც იგივეს ვაკეთებთ“, -აცხადებს „ქართული ოცნების“ საარჩევნო შტაბის ხელმძღვანელი ლაშა გვასალია.