15 მაისიდან ქალაქ ფოთში თვითმმართველი არჩევნებისთვის პოლიტიკური სუბიექტების საარჩევნო კამპანია აქტიურ ფაზაში გადადის. თვითმმართველი ქალაქ ფოთის მერობისთვის მებრძოლ კანდიდატთა სია დღითიდღე იზრდება, თუმცა, ფოთელებისთვის არჩევნებზე მთავარი ფიგურები მაინც “ქართული ოცნება-დემოკრატიული საქართველოს”, “ნაციონალური მოძრაობისა” და "ბურჯანაძე-გაერთიანებული ოპოზიციის” კანდიდატები არიან. ქალაქ ფოთის მერის მოადგილის მოვალეობის შემსრულებელი, “ქართული ოცნების” ფოთის ორგანიზაციის თავმჯდომარე ირაკლი კაკულია, “ნაციონალური მოძრაობიდან” -კი  ფოთის საკრებულოს წევრი ვახტანგ დარცმელიძე და “ბურჯანაძე-გაერთიანებული ოპოზიციის” მიერ დასახელებული დავით ქანთარია, 15 ივნისს  ფოთის მერობისთვის იბრძოლებენ. “ნაციონალური მოძრაობის” კანდიდატის, ვახტანგ დაცმელიძის განცხადებით, მათ უკვე დაიწყეს წინასაარჩევნო კამპანია, თუმცა, აქტიურად 15 მაისიდან ჩაერთვებიან. დარცმელიძის განცხადებით, ისინი ამომრჩევლებს ინფრასტრუქტურული და სოციალური პროგრამების განხორციელებას ჰპირდებიან. იმავე საკითხებზეა ორიენტირებული ფოთის ყოფილი მერი დავით ქანთარიაც. ქანთარიას განცხადებით, “ბურჯანაძე-გაერთიანებული ოპოზიციის” პარტიული სიის პრეზენტაცია ფოთში ორშაბათს,12 მაისს, გაიმართება. “ჩემი გეგმები არის ის, რაც მე დავიწყე ამ ქალაქში ათი წლის წინ. ამ გეგმებს ბოლომდე მივიყვან. ჩემი ძირითადი პრიორიტეტია ფოთის ყველა ქუჩა დაემსგავსოს ნორმალურ ქუჩას. ის იყოს არა მოხრეშილი, არამედ მოასფალტებული”-აცხადებს დავით ქანთარია.