საარჩევნო ბლოკ „არასაპარლამენტო ოპოზიცია – კუკავა, ჩიხრაძის“ ზუგდიდის შტაბის წარმომადგენლები ხელისუფლებას ადმინისტრაციული რესურსის გამოყენებაში ადანაშაულებენ. „არასაპარლამენტო ოპოზიციის“ საარჩევნო შტაბის ხელმძღვანელის თენგიზ ჯგუშიას განცხადებით, პრემიერ-მინისტრის ირაკლი ღარიბაშვილის, ზუგდიდში ვიზიტისას შეკრებილი ხალხი საქართველოს სხვადასხვა ქალაქებიდან იყო ჩამოყვანილი. ამასთან ჯგუშია, ხელისუფლებას ამომრჩევლების მოსყიდვაში ადანაშაულებს. „ხალხის გამოყვანა იმდენად გაუჭირდა ხელისუფლებას,რომ გამოიყენა ყველა მიღებული და მიუღებელი ფორმა ამომრჩეველზე ფსიქოლოგიური და სხვა სახის ზეწოლის მოსახდენად. დიახ, ახალგაზრდების მოსყიდვის ფაქტებია, აბა რა არის, როდესაც აქციაზე ახალგაზრდებს ლუდს დაურიგებ“,- აცხადებს „არასაპარლამენტო ოპოზიციის“ საარჩევნო შტაბის ხელმძღვანელი თენგიზ ჯგუშია. კოალიცია „ქართული ოცნების“ ზუგდიდის საარჩევნო შტაბის ხელმძღვანელი ლაშა გვასალია, საარჩევნო ბლოკ „არასაპარლამენტო ოპოზიციის“ ბრალდებებს აბსურდულს უწოდებს. „ჩვენ მსგავს ბრალდებებს ყურადღებას არ ვაქცევთ, რადგან კონფრონტაციას ვერიდებით", -აცხადებს ლაშა გვასალია. შეგახსენებთ, რომ საქართველოს პრემიერ-მინისტრი ირაკლი ღარიბაშვილი, 18 მაისს  ზუგდიდში იმყოფებოდა. მან „ქართული ოცნების“ გამგებლობის კანდიდატები, სამეგრელო-ზემო სვანეთის მასშტაბით წარადგინა. ამასთან, პრემიერმა ამომრჩევლებს სიტყვით მიმართა და “ქართული ოცნების” მხარდაჭერისკენ მოუწოდა.