საარჩევნო ბლოკმა „არასაპარლამენტო ოპოზიცია- კუკავა, ჩიხრაძემ“ დღეს, 20 მაისს ზუგდიდში მერობის და გამგებლობის კანდიდატები წარადგინა. „არასაპარლამენტო ოპოზიციის“ ლიდერმა კახა კუკავამ დადიანების ეზოში შეკრებილ მოსახლეობას ზუგდიდის მერობის კანდიდატად ირაკლი ღურწკაია, ხოლო რაიონის გამგებლობის კანდიდატად ოთარ ჭითანავა წარუდგინა. ქალაქის საკრებულოს პარტიული სიის პირველი ნომერი ალექსანდრე შელია იქნება. სიის მეორე ნომრი ციცინო შენგელია. ზუგდიდის მუნიციპალიტეტის სიის პირველი ნომერი ბეჟან გუნავა იქნება. კუკავამ იმედი გამოთქვა, რომ ირაკლი ღურწკაიას და ოთარ ჭითანავას ზუგდიდელების მხარდაჭერა ექნებათ. „ზუგდიდი არის საქართველოში წამყვანი ქალაქი, ქვეყნის ერთ-ერთი პოლიტიკური ცენტრია, ამიტომ ამ ქალაქის სახე უნდა იყოს ისეთი ადამიანი, რომელიც ქალაქს წარმოადგენს ღირსეულად.“-აღნიშნა კუკავამ. აქვე კუკავამ სხვა მუნიციპალიტეტების კანდიდატებიც დაასახელა. კერძოდ, ხობის გამგებლობის კანდიდატი დავით კუკავა იქნება, ხობის საკრებულოს პარტიული სიის პირველი ნომერი კახა ლატარია. აბაშაში- გელა თოფურია, მარტვილში- მიხეილ ცაავა, წალენჯიხაში - ფრიდონ უბილავა და ჩხოროწყუში - თენგიზ ზედანია. ფოთში სიის პირველი ნომერი ზაზა ლემონჯავა იქნება, ხოლო სენაკში ლარისა აგალბალაევა.