დღეს, “სახალხო პარტიის“  ზუგდიდის გამგებლობის კანდიდატმა, ვახუშტი ფარცვანიამ და „არასაპარლამენტო ოპოზიციის“ ზუგდიდის შტაბის ხელმძღვანელმა თენგიზ ჯგუშიამ, ერთობლივი ბრიფინგი გამართეს. ისინი, კოალიცია „ქართული ოცნების“ წარმომადგენლებს კახი კალაძეს და თინათინ ხიდაშელს, რომლებიც ზუგდიდში იმყოფებოდნენ, მოსახლეობისთვის მმართველი პარტიის კანდიდატების თავს მოხვევაში დასდეს ბრალი. „როდესაც უსახურ და უსუსურ კანდიდატებს თავს ახვევ ამომრჩევლებს, ეს კანონდარღვევა კი არა, მორალის დარღვევა და უზნეობაა. „ქართული ოცნების“ კანდიდატების „გასაპრავებლად“ ამოქმედებულია სახელმწიფო მანქანა“, - აცხადებს ვახუშტი ფარცვანია. „სამეგრელოს ხმის“ ლიდერი და „არასაპარლამენტო ოპოზიციის“ ზუგდიდის შტაბის ხელმძღვანელი, „რესპუბლიკური პარტიის“ წევრს თინათინ ხიდაშელს, პოლიტიკურ წარსულს ახსენებს და ამბობს, რომ მას ზვიად გამსახურდიას კუთხეში- სამეგრელოში,  „ქართული ოცნების“ სასარგებლოდ აგიტაცია-პროპაგანდის მორალური უფლება არა აქვს. ამასთან, თენგიზ ჯგუშია და ვახუშტი ფარცვანია „ქართული ოცნების“ წარმომადგენლებთან,  კახი კალაძესა და თინათინ ხიდაშელთან დებატებს ითხოვენ.