ტოტალიზატორის თანამშრომლის,რობერტ გაბისონიას ცემაში ბრალდებულ ლევან დარასელიას საქმეზე მოსამართლემ გამამართლებელი ვერდიქტი გამოიტანა და დარასელია სასამართლო სხდომის დარბაზიდანვე გაათავისუფლა. მოსამართლე დავით გელაშვილმა დღეს ბრალდების და დაცვის მხარის დასკვნითი სიტყვები მოისმინა, რის შემდეგაც მან ბრალდებულის სასჯელისგან გათავისუფლების გადაწყვეტილება მიიღო. დარასელიას ბრალდების მხარე ტოტალიზატორის დაცვის თანამშრომლის ცემსა და ძარცვას ედავებოდა, რაც სისხლის სამართლის კოდექსის 178-ე მუხლის მესამე ნაწილის „ა“ და „ბ“ ქვეპუნქტებით 5-8 წლამდე თავისუფლების აღკვეთას გულისხმობს, მოსამართლემ მუხლი გადააკვალიფიცირა და დარასელიას ქმედებზე  125-ე მუხლის პირველი ნაწილით წარუდგინა  , რაც ადამიანის ცემას გულისხმობს და 1000 ლარის ოდენობით ჯარიმას ითვასიწინებს, თუმცა,იმის გამო,რომ დარასელია 20 იანვრიდან დღემდე წინასწარ პატიმრობაში იმყოფებოდა,მოსამართლემ იგი სასჯელისგან სრულად გაათავისუფლა. შეგახსენებთ, რომ ინციდენტი დარასელიასა და გაბისონიას შორის მიმდინარე წლის 19 იანვარს მოხდა, დარასელიამ მათ შორის ადრე არსებული დაპირისპირების გამო გაბისონია სცემა. ბრალდების მხარე კი მას გაბისონიას ცემასა და ძიებისთვის უცნობ პირთან ერთად მის გაძარცვას ედავებოდა. თუმცა, პროკურორმა ვერც ამოუცნობი პირის ვინაობა დაადგინა და ვერც ძარცვის ფაქტი დაამტკიცა. როგორც დარასელიამ აღნიშნა, მას მხოლოდ ღირსების დაცვა და გაბისონიაზე ჯავრის ყრა სურდა, მისი გაძარცვა კი არც უფიქრია. ბრალდებულის ადვოკატის იოსებ ჯანაშიას განცხადებით, სასამართლომ ფაქტი სწორად შეაფასა და ობიექტური გადაწყვეტილება მიიღო.