თბილისში ”კავკაზ-ჯაზ-ფესტივალი” მიმდინარეობს
ჯაზ-ფესტივალი ყოველ წელს იმართება და საგანმანათლებლო ხასიათს ატარებს. ფესტივლის მიზანია ხელი შეუწყოს სამხრეთ კავკასიაში ჯაზის განვითარებას, შემსრულებლებს შორის კულტურულ დიალოგსა და მათ მეგობრულ დაახლოებას, რაც ასევე მათ შემდგომ თანამშრომლობას შეუწყობს ხელს. ”Kavkaz Jazz” ფესტივალის ფარგლებში მასტერკლასები 20 ივლისის ჩათვლით ჩატარდება. ფესტივალის პროგრამა, ტრადიციულად ყოველდღიური კონცერტებისა და ”ჯემ-სეიშენებისგან” შედგება, სადაც ქართველ მუსიკოსებთან ერთად მონაწილეობას სომხეთიდან, აზერბაიჯანიდან და პოლონეთიდან მოწვეული სტუმრები იღებენ.
ფესტივალი წელს პირველად უმასპინძლებს ”მრგვალი მაგიდების” სერიას, სადაც სამხრეთ კავკასიის წამყვანი ექსპერტები, კულტურის მენეჯერები და არტ-კრიტიკოსები იმსჯელებენ რეგიონულ მუსიკალურ ბაზარზე შექმნილ პრობლემებსა და მათი გადაჭრის გზებზე.
”Kavkaz Jazz” ფესტივალი 2010 წლიდან ტარდება, ამ პერიოდის განმავლობაში კი ფესტივალში 50-მდე მუსიკოსმა მიიღო მონაწილეობა. პროექტის ორგანიზატორია არასამთავრობო ორგანიზაცია ”Art Bridge”. პროექტის მხარდამჭერები არიან: საქართველოს კულტურისა და ძეგლთა დაცვის სამინისტრო და ქ.თბილისის მერიის კულტურული ღონისძიებების ცენტრი.
მასალის გამოყენების პირობები