აფხაზეთის სტრატეგიული და საგარეო პოლიტიკური ორიენტაცია განსაზღვრულია და ჩვენ არ ვაპირებთ მივაწყდეთ სხვადასხვა ორიენტირებს, განუცხადა სააგენტო REGNUM - ს დე ფაქტო აფხაზეთის პრეზიდენტის აპარატთან არსებული სტრატეგიული კვლევების ცენტრის დირექტორმა, ოლეგ დამენიამ. მანამდე, საქართველოს პრემიერ-მინისტრმა ირაკლი ღარიბაშვილმა კიდევ ერთხელ განაცხადა, რომ საქართველო მზადაა ევროკავშირთან ასოცირების შედეგად მიღებული ყველა სიკეთე „აფხაზეთისა და ცხინვალის რეგიონში მცხოვრებ ჩვენს თანამოქალაქეებს გავუნაწილოთ". ოლეგ დამენიამ აღნიშნულ განცხადებას იმ პოლიტიკის ლოგიკის შესაბამისი უწოდა, რომელსაც საქართველო ატარებს. „ აფხაზეთისთვის ამგვარი ლოგიკა იყო და რჩება მიუღებელი . საქართველოს შეუძლია დაუახლოვდეს, ინტეგრირდეს და ასოცირდეს ნებისმიერ ქვეყნებსა და რეგიონებთან. ეს მისი უფლებაა. ზუსტად ასევე, ჩვენც ვფლობთ უფლებას და განვსაზღვრავთ, ვის დავუახლოვდეთ და ვისთან ვარჩიოთ ინტეგრირება", - განაცხადა მან. რაც შეეხება ევროპას, დამენიას სიტყვებით, აფხაზეთი მას არც თუ ისე ცუდად იცნობს :"ჩვენ მის მიმართ კარგად ვართ განწყობილნი და მისი მხრიდან საპასუხო რეაქციას ველოდებით. ჩვენ მზად ვართ ვითანამშრომლოთ ევროპასთან, თუ ის პატივისცემას გამოხატავს ჩვენი პოლიტიკური ნების მიმართ,“ - განაცხადა ოლეგ დამენიამ.