"ზუგდიდის საფეხბურთო გუნდისთვის “ზუგდიდი” ნორმალური პირობების შესანარჩუნებლად ქალაქ ზუგდიდის ხელისუფლება ყველაფერს აკეთებს, თუმცა გუნდის ხარჯები მინიმუმამდეა დაყვანილი".-აცხადებს ქალაქ ზუგდიდის მერი ირაკლი გოგოხია. მისი თქმით,გუნდის გადასარჩენად ინვესტორის მოძიებაც დაიწყო, თუმცა,მხოლოდ ფარატინა ქაღალდს ინვესტორებს ვერ შესთავაზებენ. "გუნდს არ აქვს ბაზა, სტადიონი, ინფრასტრუქტურა. ჩვენ ეს ყველაფერი უნდა შევქმნათ. ჩვენ რეალური ბაზა უნდა შევთავაზოთ ინვესტორს. ჩვენ აქეთკენ მივდივართ, ერთი წელი, ორი წელი და მერე უკვე უნდა დავაინტერესოთ კერძო ინვესტორი“, – აცხადებს ირაკლი გოგოხია. საკრებულოს სხდომაზე გუნდის ახალმა ხელმძღვანელმა გელა ინალიშვილმა აღნიშნა, რომ “ზუგდიდი” 9 აგვისტოს ეროვნული ჩემპიონატის ფარგლებში ქობულეთის “შუქურასთან” გასვლით შეხვედრას გამართავს. “წინასწარ თადარიგს არ ვიჭერთ, ცუდად ვითამაშებთ თუ კარგად. ჩვენ მართლაც შევკრიბეთ გუნდი ამ მცირე დროის განმავლობაში. გუნდი არის წარმოდგენილი სრული შემადგენლობით, თუმცა, გუნდის ჩამოყალიბებას წლები სჭირდება,” -აცხადებს საფეხბურთო გუნდის ახალი ხელმძღვანელი გელა ინალიშვილი.