თუ ფინანსური მდგომარეობის გამო კოსმოსურ ტურისტად ქცევას ვერ ახერხებთ, თუმცა ოცნებობთ დიდი სიმაღლეების დაპყრობაზე, შეგიძლიათ მსოფლიოს ყველაზე მაღალ სასტუმროებს ეწვიოთ. გთავაზობთ მსოფლიოს 5 სასტუმრო–ცათამბჯენის რეიტინგს Grand Hyatt Shanghai, ჩინეთი სასტუმრო „ცზინ მაოს კოშკის“ 51–დან 87–ე სართულებამდე სივრცეს იკავებს. აქ სულ 555 ოთახი და ელეგანტურად მოწყობილი ნომერია. დატვირთული დღის შემდეგ ვიზიტორებს შეუძლიათ კლუბ Oasis Spa–ში განტვირთვა. ვისაც სიმაღლის არ ეშინია, სასტუმროში „ზეციურ აუზს“ შესთავაზებენ, საიდანაც შანხაის პანორამული ხედით დატკბებიან. Four Seasons Hotel Guangzhou, ჩინეთი საერთაშორისო ფინანსური ცენტრის 103–სართულიანი შენობის 74–98 ოთახები Four Seasons Hotel–ს აქვს გადაცემული. თავად შენობა გუანჩჟოუს ოპერის თეატრის სიახლოვეს მდებარეობს. ოტელში 344 ნომერია, აქედან 42 – ლუქს კლასის. ცენტრის მეასე სართულზე განთავსებულია ზღვის სამზარეულოს რესტორანი, საიდანაც ქალაქის უმშვენიერესი ხედები იშლება. The St. Regis Shenzhen, ჩინეთი ოტელი განთავსებულია ცათამბჯენ KingKey–ს 73–100 სართულებს შორის. ესაა მსოფლიოში სიმაღლით მერვე შენობა. სასტუმრო აერთიანებს ფუფუნებასა და კომფორტს, მის დიზაინზე ცნობილი არქიტექტორი ტერი ფარელი მუშაობდა. ოტელში 257 სასტუმრო ოთახი და 33 ლუქსია, 75–ე სართულზე კი განთავსებულია სპა და დიდი აუზი. სასტუმროს მცხოვრებლებს შეუძლიათ ეწვიონ არაერთ ძვირადღირებულ რესტორანს, ასევე ბარ Decanter–ს, რომელშიც ქალაქში ღვინოების ყველაზე დიდი კოლექცია ინახება. Park Hyatt Shanghai, ჩინეთი სასტუმრო მდებარეობს შანხაის მსოფლიო ფინანსური ცენტრის შენობის 73–93–ე სართულებს შორის. თავად ცენტრი კი ქალაქის ბიზნეს–რაიონშია განთავსებული. თითოეული ნომრიდან, რომელთა რაოდენობაც 174–ია, გადაშლილია მდინარე ხუანპუს ულამაზესი ხედი. სასტუმროში ფუნქციონირებს ქალაქის ყველაზე პოპულარული რესტორნები, მაგალითად 100 Century Avenue Restaurant. ზედმეტია საუბარი იმაზე, რომ ოტელს აქვს სპა და აუზი. Ritz-Carlton, ჰონგკონგი 500 მეტრის სიმაღლის საერთაშორისო კომერციულ ცენტრში განთავსებული Ritz-Carlton–ი მსოფლიოში ყველაზე მაღალი სასტუმროა. მისი დიზაინი შექმნილია კომპანია LTW Designworks–ის მიერ და ქალაქის სწრაფად განვითარებადი კულტურითაა შთაგონებული. ოტელის თითქმის ყველა ნომერში მდებარეობს ტელესკოპი, რომლის საშუალებითაც შესაძლოა ქალაქის ზემოდან დათვალიერება. ცხადია, Ritz-Carlton–ი მაღალი კლასის სასტუმროს ყველა საჭირო ატრიბუტით – ბარებით, აუზებით, ძვირფასი აპარტამენტებითა და რესტორნებითაა აღჭურვილი.