ამერიკის ქალაქ ჩარლსტონში 151 წლის წინ ჩაძირული გემ Mary Celestia-ზე ნაპოვნი ღვინო დააგემოვნეს. ამის შესახებ Reuters-ი წერს. დეგუსტაციას 50 მაყურებელი ესწრებოდა, რომლებმაც ამისთვის საგანგებოდ ბილეთები შეიძინეს. აღმოჩნდა, რომ ბოთლში ესხა მღვრიე, მოყვითალო ნაცრისფერი სითხე, რომელსაც ზღვის წყლის, ბენზინის, ძმრის, ციტრუსისა და ალკოჰოლის გემო ჰქონდა. სომელიებს სასმელის გემო და სუნი არ მოეწონათ. ექეპერტებმა აღნიშნეს, რომ ღვინო 38-გრადუსიანია, მათივე თქმით, შესაძლოა, ჭურჭელში ესპანური მაგარი ღვინო ან სპირტის ხსნარი ესხა. ღვინის ბოთლი ზღვის არქეოლოგებმა ბოცმანის კარადაში აღმოაჩინეს. Mary Celestia-ზე სულ ხუთი სპირტიანი სასმელის ბოთლი, ასევე ქალის სუნამოები, ფეხსაცმელები, სავარცხლები და სხვა ნივთები იპოვეს. Mary Celestia-ს აშშ-ს სამოქალაქო ომის დროს, რომელიც 1861-65 წლებში მიმდინარეობდა, კონფედერაციის არმიის ტვირთი გადაჰქონდა. ხომალდი ატლანტის ოკეანეში ბერმუდის კუნძულებთან რიფს დაეჯახა და ექვს წუთში ჩაიძირა.