iPad-ი, რომელიც რომის პაპს ფრანცისკეს ეკუთვნოდა ურუგვაის დედაქალაქ მონტევიდეოში, აუქციონზე 30, 5 ათას დოლარად გაიყიდა. როგორც Reuters,-ი იტყობინება, მიღებული შემოსავალი ადგილობრივ გაჭირვებულ ბავშვთა სკოლას მოხმარდება. აუქციონის სახლის Castells-ის მესვეურთა თქმით, მოგებული ფსონი ტელეფონით გაკეთდა. ამასთან კომპანიის წარმომადგენლებმა აუქციონის გამარჯვებულის ვინაობა არ დაასახელეს. მანამდე ფრანცისკემ პლანშეტი ურუგვაელ სასულიერო პირს გონსალო ემილიუსს გადასცა. მოგვიანებით მან iPad-ის გაყიდვა Sotheby's-სა და Christie’s-ის აუქციონების დახმარებით სცადა, მაგრამ მისი მცდელობები წარუმატებლად დასრულდა. ამის შემდეგ სასულიერო პირმა პლანშეტის გაყიდვა ადგილობრივი აუქციონის მეშვეობით გადაწყვიტა. მოწყობილობის უკანა მხარეს დატანილია წარწერა His Holiness Francisco. Servizio Internet Vatican, March 2013 („მისი უწმინდესობა ფრანცისკე. ვატიკანის ინტერნეტ-სამსახური, 2013 წლის მარტი“). გაჯეტს აქვს სერთიფიკატი, რომელსაც ხელს აწერს რომის პაპის პირადი მდივანი ფაბიან პედაკიო. ეს პირველი შემთხვევა არ არის, როდესაც ფრანცისკეს პირადი ნივთები აუქციონზე გამოიფინა. 2014 წელს 260 ათას დოლარად გაიყიდა რომის პაპის კუთვნილი მოტოციკლი Harley Davidson-ი.