ქალაქ ზუგდიდის საკრებულომ მუნიციპალიტეტის საკრებულოს წევრთა ეთიკის კოდექსის მისაღებად ადმინისტრაციული წარმოება დაიწყო. ეთიკის პროექტზე ფრაქციამ "ზუგდიდის მომავლისთვის" იმუშავა. ფრაქციის წარმომადგენლების თქმით, კოდექსის პროექტი ეუთოს ადამიანის უფლებათა დაცვის ოფისის მიერ შემუშავებული მასალების მიხედვით მომზადდა. დეპუტატებს კოდექსის პროექტი იურიდიულ და სამანდატო, ადამიანის უფლებათა დაცვისა და ეთიკის საკითხთა კომისიის თავმჯდომარემ ნუგზარ სარიამ გააცნო. ეთიკის ქოდექსის მისაღებად ადმინისტრაციული წარმოების დაწყებას ყველა დეპუტატმა დაუჭირა მხარი. საკრებულოს თავმჯდომარის მერაბ ქვარაიას განცხადებით, კოდექსის საბოლოოდ დამტკიცების შემთხვევაში, საქართველოში ზუგდიდი იქნება პირველი ქალაქი, რომლის საკრებულოსაც ეთიკის საკუთარი კოდექსი ექნება. ეთიკის პროექტის მესამე თავის მიხედვით, საკრებულოს წევრები ვალდებულები არიან დაიცვან საკრებულოს ავტორიტეტი და საზოგადოებრივი ინტერესები, არ დაუშვან კოლეგების, საკრებულოში მომუშავეთა და სხვა პირთა შეურაცხყოფა და უპატივცემლობა მათი განსხვავებული პოზიციის ან მცდარი შეხედულობის გამო.  ასევე, საკრებულოს წევრები არ უნდა იყენებდნენ დამამცირებელ, შეურაცხმყოფელ გამოთქმებსა და უხამს სიტყვებს. გთავაზობთ რამდენიმე მუხლს ამავე კოდექსის პროექტიდან: 1. საკრებულოს წევრებმა თავის საქმიანობაში არ უნდა დაუშვან ნეპოტიზმი და ნებისმიერ შემთხვევაში უნდა აღკვეთონ  ეს უარყოფითი მოვლენა. 2. საკრებულოს წევრებმა აქტიურად უნდა ითანამშრომლონ მასობრივი ინფორმაციის საშუალებების წარმომადგენლებთან საზოგადოებისთვის აქტუალურ საკითხებთან დაკავშირებით. 3. საკრებულოს წევრებმა კრიტიკის მიმართ ტოლერანტული და კორექტული დამოკიდებულება უნდა გამოავლინონ. კოდექსის პროექტის თანახმად, ეთიკის კოდექსის  დარღვევის გამო საკრებულოს წევრს წესრიგისკენ მხოლოდ  საკრებულოს თავმჯდომარემ შეიძლება მოუწოდოს. კოდექსის დამრღვევს შემდეგი პასუხისმგებლობა ეკისრება: წესრიგისკენ მოწოდება. გაფრთხილება. გაფრთხილება ოქმში შეტანით. სიტყვით გამოსვლის უფლების ჩამორთმევა შესაბამის საკითხზე გადაწყვეტილების მიღებამდე. ემოციურად გამოხატავს თავის კმაყოფილებას ან უკმაყოფილებას სხდომის მიმდინარეობასთან დაკავშირებით, რითაც ხელს უშლის სხდომის მიმდინარეობას და სხვა. სხდომაზე მომხდარ ინციდენტს შესაბამისი კომისია განიხილავს.  საბოლოოდ, კოდექსის დამრღვევის ვინაობა გასაჯაროვდება. "მოხდება საკრებულოს ყველა იმ წევრის ვინაობის გასაჯაროება ყველა კონკრეტულ შემთხვევაში, როდესაც ადგილი ექნება მათი მხრიდან არაეთიკური და არაპროფესიული საქციელის ჩადენას", - წერია კოდექსის პროექტში. ნუგზარ სარიას განცხადებით, კოდექსის პროექტის დეტალური განხილვა და საჭიროების შემთხვევაში ცვლილებების შეტანა მომდევნო სხდომებზე გახდება შესაძლებელი.