ბოლო რამდენიმე კვირაა, რაც ინტერნეტ სივრცეში აქტიურად ვრცელდება ჯარედ ლეტოს ჯოკერის გარეგნობის ამსახველი სხვადასხვა სავარაუდო ფოტო. მაყურებელი მოუთმენლად ელოდა კომიქსების გმირის ახალი გარეგნობის ხილვას და აი, ტელეეკრანებზე გმირის პირველად გამოჩენიდან 75წლის თავზე, “Suicide Squad”-ის რეჟისორმა, დევიდ აიერმა, საკუთარ ინსტაგრამის გვერდზე ჯოკერის პირველი ოფიციალური ფოტოც გამოაქვეყნა!

ბოდი არტის მრავალრიცხოვანი ნიმუშებით სხეულზე, 90-იანი წლების როკ და პანკ ვარსკვლავების იმიჯის მქონე ჯოკერმა, ნამდვილად დაამსხვრია მაყურებელში დღემდე კარგად გამჯდარი კომიქსების გმირის სახე. არ ვიცით რამდენად საჭიროა მრავალი ტატუდან ერთ- ერთი იყოს წარწერა შუბლზე – „Damaged”, მაგრამ… ეს ჯოკერია და მას თამაშის საკუთარი წესები აქვს! ბუნებრივია, ახალ გმირს კრიტიკის ქარცეცხლში გავლა მოუწევს იმ ადამიანთა მხრიდან, რომლებიც ჯოკერის პირვანდელ, უფრო მხიარულ სახეს ანიჭებენ უპირატესობას, თუმცა ვნახოთ რას გვიჩვენებს მომავალი გადაღებები.

ფილმი მოგვითხრობს ბოროტმოქმედთა გუნდზე, რომლებიც დანაშაულის გამოსყიდვის მიზნით, შეწყალების სანაცვლოდ, საიდუმლო სახელმწიფო სააგენტოს მიერ დაკისრებულ საშიშ და სარისკო მისიებს ასრულებენ. ლეტო “Suicide Squad”-ის მთავარი გმირია, თუმცა ფილმში წამყვან როლებში ასევე ვიხილავთ უილს სმიტს დედშოთის, ჯოელ კინემანს რიკ ფლეგის, მარგო რობის ჰარლეი ქვინის, ჯეი კორტნის კაპიტანი ბუმერანგის, კარა დელევინს ენთანტრესის, ვიოლა დევისს ამანდა ვოლერის, ჯეი ჰერნანდესს ელ დიაბლოს, ადევალე აკინუოიე-აგბაკეს მკვლელი კროკის, კარენ ფუკუარას პლასტიკის, სკოტ ედვარდს სტივ ტრევორის და ჯიმ პარაკს ჯონი ფროსტის როლებში. ფილმში ასევე ითამაშებენ იკე ბარინჰოლდსი და ცნობილი ამერიკელი რეპერი ქომონი, თუმცა მათი გმირებისვინაობა ჯერჯერობით არაა ცნობილი. ამჟამად აიერი ფილმის წარმოების პროცესშია. გადაღებები დაიწყება 2015წლის აპრილში ხოლო “Suicide Squad”-ის მსოფლიო პრემიერა 2016წლის 5აგვისტოს იგეგმება.