ქალაქ ზუგდიდის საკრებულოს წევრებმა საზოგადოებრივი ორგანიზაციის წარმომადგენლებთან ერთად ,,საკრებულოს წევრის ეთიკის კოდექსი“ განიხილეს. კოდექსის საჯარო განხილვა საერთაშორისო ორგანიზაცია NDI-ს ორგანიზებით, ზუგდიდის დემოკრატიული ცენტრის ოფისში გაიმართა. ეთიკის კოდექსის პროექტზე ქალაქ ზუგდიდის საკრებულოს ფრაქციამ „ ზუგდიდის მომავლისთვის“ იმუშავა. კოდექსის საბოლოოდ დამტკიცების შემთხვევაში, საქართველოში ზუგდიდი იქნება პირველი ქალაქი, რომლის საკრებულოსაც ეთიკის საკუთარი კოდექსი ექნება. არასამთავრობო ორგანიზაციის წარმომადგნელებს ეთიკის კოდექსთან დაკავშირებით, საკუთარი მოსაზრებები და შენიშვნები აქვთ. "სამართლებრივი დაცვის ინსტიტუტის" იურისტის რუსუდან პაჭკორიას თქმით, კოდექსის პრეამბულაში კოდექსისი მიზანი აუცილებლად უნდა იყოს მითითებული, რასაც კოდექსის პროექტის ავტორებიც დაეთახმნენ. ასევე, "სამართლებრივი დაცვის ინსტიტუტის" იურისტის აზრით, კოდექსის პროექტის პირველი თავიდან, რომელიც საკრებულოს წევრთა საქმიანობის პრინციპებს განსაზღვრავს, საკამათოა ერთ-ერთი პუნქტი - გულწრფელობა. აღნიშნულ პუნქტთან დაკავშირებით, ასევე შენიშვნები გამოთქვა ფრაქცია „ერთიანი ნაციონალური მოძრაობის“ წევრმა ანა წითლიძემ. მისი თქმით, გულწრფელობას ერთმნიშვნელოვნად ვერ შეაფასებ. კოდექსის ამავე თავთან დაკავშირებით, რეკომენდაციები გასცა საერთაშორისო ორგანიზაცია NDI-ს წარმომადგენელმა ლაშა გოგიძემ. მისი თქმით, სიტყვების - საქვეყნოობა და პატიოსნება - ნაცვლად უმჯობესია ეწეროს შემდეგი სიტყვები: გამჭვირვალობა და კეთილსინდისიერება. საკრებულოს იურიდიულ და სამანდატო, ადამიანის უფლებათა დაცვისა და ეთიკის კომისის თასვმჯდომარის ნუგზარ სარიას თქმით, ისინი გაითვალისწინებენ ყველა შენიშვნას თუ მოსაზრებას. ეთიკის კოდექსის პროექტის თანახმად, საკრებულოს წევრები ვალდებულები არიან დაიცვან საკრებულოს ავტორიტეტი და საზოგადოებრივი ინტერესები, არ დაუშვან კოლეგების, საკრებულოში მომუშავეთა და სხვა პირთა შეურაცხყოფა და უპატივცემლობა მათი განსხვავებული პოზიციის ან მცდარი შეხედულობის გამო. ასევე, საკრებულოს წევრები არ უნდა იყენებდნენ დამამცირებელ, შეურაცხმყოფელ გამოთქმებსა და უხამს სიტყვებს. გთავაზობთ რამდენიმე მუხლს ამავე კოდექსის პროექტიდან: 1. საკრებულოს წევრებმა თავის საქმიანობაში არ უნდა დაუშვან ნეპოტიზმი და ნებისმიერ შემთხვევაში უნდა აღკვეთონ ეს უარყოფითი მოვლენა. 2. საკრებულოს წევრებმა აქტიურად უნდა ითანამშრომლონ მასობრივი ინფორმაციის საშუალებების წარმომადგენლებთან საზოგადოებისთვის აქტუალურ საკითხებთან დაკავშირებით. 3. საკრებულოს წევრებმა კრიტიკის მიმართ ტოლერანტული და კორექტული დამოკიდებულება უნდა გამოავლინონ. კოდექსის პროექტის თანახმად, ეთიკის კოდექსის დარღვევის გამო საკრებულოს წევრს წესრიგისკენ მხოლოდ საკრებულოს თავმჯდომარემ შეიძლება მოუწოდოს. კოდექსის დამრღვევს შემდეგი პასუხისმგებლობა ეკისრება: წესრიგისკენ მოწოდება. გაფრთხილება. გაფრთხილება ოქმში შეტანით. სიტყვით გამოსვლის უფლების ჩამორთმევა შესაბამის საკითხზე გადაწყვეტილების მიღებამდე. ემოციურად გამოხატავს თავის კმაყოფილებას ან უკმაყოფილებას სხდომის მიმდინარეობასთან დაკავშირებით, რითაც ხელს უშლის სხდომის მიმდინარეობას და სხვა. სხდომაზე მომხდარ ინციდენტს შესაბამისი კომისია განიხილავს. საბოლოოდ, კოდექსის დამრღვევის ვინაობა გასაჯაროვდება. “მოხდება საკრებულოს ყველა იმ წევრის ვინაობის გასაჯაროება ყველა კონკრეტულ შემთხვევაში, როდესაც ადგილი ექნება მათი მხრიდან არაეთიკური და არაპროფესიული საქციელის ჩადენას”, – წერია კოდექსის პროექტში.