ქართულმა ნაციონალურმა ბალეტმა, საქართველოს დამოუკიდებელობის დღე ეგვიპტის პირამიდებთან შთამბეჭდავი კონცერტით აღნიშნეს. ეგვიპტეში საქართველოს საელჩო ამ კონცერტის გამართვას რამდენიმე წელია გეგმავდა, თუმცა საქართველოს ელჩისა და ეგვიპტის ტურიზმის მინისტრის შეხვედრის შემდეგ, ღონისძიების ჩატარება 26 მაისს გადაწყდა. ორსაათიანი კონცერტი ოთხი ათასამდე მაყურებელმა იხილა. ძველ კლასიკურ ნომრებთან ერთად, ანსამბლმა ახალი ქორეოგრაფიული ნომრებიც წარმოადგინა და დამსწრე საზოგადოებას შერეული პროგრამა წარუდგინა. ამ კონცერტისთვის შესრულდა რამოდენიმე, სხვადასხვა წლებში დადგმული ცეკვაც. "ქართველები ძალიან ლამაზი ხალხი ხართ. კონცერტი ნამდვილად არაჩვეულებრივი გამოვიდა რისთვისაც ძალიან დიდ მადლობას გიხდით" - განაცხადა დულ აბდულრაჰიდმა, ეგვპიტის კულტურის მინისტრმა. კონცერტს ეგვიპტის მასშტაბით პირდაპირ ეთერში რამოდენიმე ეგვიპტური არხი გადასცემდა, ხოლო დამსწრე საზოგადოება შოუს დამთავრების შემდეგ ანსამბლს აპლოდისმენტებით დიდი ხნის განმავლობაში აჯილდოვებდა. უძველესი ცივილიზაციის კერასთან გამართლი კონცერტი ქართული ნაციონალური ბალეტის 70 წლიან ისტორიაში ერთ-ერთ გამორჩეულ სანახაობად დარჩება.