ზუგდიდის ინფექციური საავადმყოფოს მედპერსონალი კომპანია „ბლოკ ჯორჯიას“ დაწესებულებაში შესვლას და მენეჯმენტის შეცვლას კვლავ აპროტესტებს. საავადმყოფოს დირექტორ მადონა სართანიას ინფორმაციით, ეკონომიკის სამინისტრომ „ბლოკ ჯორჯიას“ საავადმყოფო 2007 წელს საკუთრებაში გადასცა, თუმცა მისივე თქმით, ამის შემდეგ კომპანიას დაწესებულების განვითარებისთვის არაფერი გაუკეთებია. აქედან გამომდინარე, სართანია საავადმყოფოში  „ბკლოკ ჯორჯიას“ შესვლას და მენეჯმენტში ჩარევას  უსამართლოდ მიიჩნევს. „კომპანია „ბლოკ ჯორჯიას“ არაფერი გაუკეთებია საავადმყოფოს არსებობისთვის. ახლა, როდესაც დაიწყო C ჰეპატიტის ელიმინაციის პროგრამის განხორციელებისთვის მზადებაა დაწესებულებაში და ოთახების რემონტი, მოვიდნენ "ბლოკ ჯორჯიას" წარმომადგენლები და ხელს გვიშლიან“ , - თქვა მადონა სართანიამ. მოგვიანებით, აქციის მონაწილეებთან ზუგდიდის რაიონული სამმართველოს უფროსი კობა ხარებავა მივიდა და დაწესებულების დირექტორის მადონა სართანიას პრეტენზიები პირადად მოისმინა. საავადმყოფოს მედპერსონალის თქმით, ისინი დაწესებულებაში „ბკლოკ ჯორჯიას“ მენეჯმენტის გატარებას არ დაუშვებენ და სასამართლოში აპირბენ ბრძოლას. ამასთან, მათი თქმით, ისინი ყველა სახელმწიფო უწყებას დახმარების თხოვნით მიმართავენ. კომპანია „ბლოკ ჯორჯიაში“ აცხადებენ, რომ  ზუგდიდის ინფექციური საავადმყოფოს 100 %-იანი  წილის კანონიერი მფლობელი „ბლოკ ჯორჯიაა“.  საავადმყოფოს მედპერსონალის ბრალდებები და პრენტენზიები  კი მათთვის გაუგებარია. კომპანიის წარმომადგენლის ლია ჯანაშვილის თქმით, საავადმყოფოს თანამშრომლებს და პაციენტებს კომპანიის მხრიდან არანაირი საფრთხე არ ემუქრებათ და ისინი დაწესებულების დირექტორმა შეიყვანა შეცდომაში. „კომპანია საავადმყოფოსთვის პროფილის შეცვლას ან დაწესებულების გაყიდვვას არ აპირებს. პირიქით, კომპანიამ გადწყვიტა რომ, გააუმჯობესოს ინფრასტრუქტურა, მენეჯმენტი და მიწოდებული სამედიცინო სერვისების ხარისხი. ხარჯების კონტროლის მიზნით კომერციული დირექტორის თანამდებობაზე  ზაზა ფიფია დაინიშნა, ხოლო მადონა სართანიასთვის შეთავაზებული იქნა სამედიცინო მენეჯერის თანამდებობა, რაც მისთვის მიუღებელი აღმოჩნდა“, - თქვა ლია ჯანაშვილმა. მისივე ინფორმაციით, იგეგმება C ჰეპატიტის ელიმინაციის პროექტში ჩართვა, რისთვისაც კლინიკამ სოლიდური რეინვესტიცია განახორციელა. მისივე თქმით, სამეგრელოს მოსახლეობას სულ მალე კიდევ ერთი თანამედროვე სტანდარტების შესაბამისი კლინიკა ექნება.