ცოტა ხნის წინ, ზუგდიდში, სახელმწიფო რწმუნებულის შენობის წინ მიმდინარე აქციაზე, კოალიცია „ძლიერი საქართველოს“ ზუგდიდის ორგანიზაციის წევრი, თენგიზ ქოჩუა სამართალდამცავებმა დააკავეს, რასაც თვითმხილველების თქმით, წინ შელაპარკება უსწრებდა.

„უსამართლოდ დააკავეს ,,ლელოს'' წარმომადგენელი თენგიზ ქოჩუა, რა დროსაც ჩვენ ვცდილობდით გაგვერკვია მიზეზი, რატომ აკავებდნენ, მერე ვცდილობიდთ, ასე ვთქვათ, რომ არ გაგვეტანებინა თენგოს თავი, რა დროსაც მომხვდა ვიღაცის ხელი, თუ სპეციალურად გამარტყეს, მაგასაც ვერ ვიხსენებ“, - ამბობს „დროას“ ადგილობრივი წარმმადგენელი და აქტივისტი, მარიამ სიჭინავა.

„დააკავეს ,,ძლიერი საქართველოს" ზუგდიდის ორგანიზაციის წევრი თენგო ქოჩუა  სხვა დეტალები ამ დროისთვის უცნობია...“, - ამის შესახებ სოციალურ ქსელში წერს „ძლიერი საქართველოს“ , - სოფო შამუგია.

ჯერჯერობით გაურკვეველია, რამ გამოიწვია სიტყვიერი დაპირისპირება პოლიციასა და ოპოზიციური პარტიის წარმომადგენელს შორის.

რადიო ,,ათინათს'' შსს - ში დაუდასტურეს, რომ თენგიზ ქოჩუა დაკავებულია 173- მუხლით, რაც პოლიციის მოთხოვნისადმი  დაუმორჩილებლობას გულისხმობს.

შეგახსენებთ, უკვე მეთექვსმეტე დღეა, მოქალაქეების ნაწილი აპროტესტებს „ქართული ოცნების“ გადაწყვეტილებას, ევროკავშირთან მოლაპარაკებების გახსნის 2028 წლამდე შეჩერების შესახებ.

28 ნოემბრიდან, საპროტესტო დემონსტრაციები, საქართველოს მასშტაბით იმართება.