ამ წუთებში, ზუგდიდის მუნიციპალიტეტის მერიის შენობის წინ საპროტესტო აქცია მიმდინარეობს. მოქალაქეების ნაწილი საქართველო-EU-ის სტრატეგიული ურთიერთობების შეფერხებას აპროტესტებს.

პროტესტის მონაწილეების თქმით, რომ მათი მოთხოვნები უცვლელი რჩება, რაც ხელახალი არჩევნების ჩატარებასა და თბილისში, აქციებისას დაპატიმრებული მოქალაქეების გათავისუფლებას გულისხმობს.

ზუგდიდელი ედუარდ ფარცვანია რადიო "ათინათთან" ამბობს, რომ მნიშვნელოვანია საქართველოს პოლიტიკურ დღის წესრიგში ევროპული კურსის დაბრუნება, რაც მისი თქმით, ქვეყნის მოსახლეობის უმრავლესობის ისტორიული არჩევანია.

"როგორც სხვა ქალაქებში, მათ შორის ზუგდიდში უკვე 26 - დღეა იმართება უწყვეტი საპროტესტო აქცია, სადაც თითოეული ადამიანი ვცდილობთ დავაფიქსიროთ ის ჩვენი გულის წუხილი, რაც არის მიმდინარე მოვლენებთან დაკავშირებული, ის უკვე აშკარა გადახვევა ევროპული კურსიდან, რომელიც დამღუპველია ჩვენი ქვეყნის მომავლისთვის. თუ რატომ ვიკრიბებით აქ, ჯერ სამუშაო დღეებში მერიასთან და შემდეგ, გადავდივართ სამხარეო ადმინისტრაციასთან, ეს იმის მაგალითია, რომ ყველა საჯარო მოხელემ უნდა იგრძნოს რეალობა. მათ უნდა გაიგონონ ჩვენი ხმა, რომელიც ისმის არა მარტო ერთ ლოკაციაზე, ისმის მთელს ქვეყანაში და საქართველოში", - ამბობს ფარცვანია.

სამოქალაქო აქტივისტი ცაბუნია ვართაგავა ამბობს, რომ მერიასთან აქციების გამართვის მიზანია, საჯარო მოხელეებს გააგონონ მოქალაქეების ხმა და შეახსენონ ქვეყანაში მიმდინარე მოვლენები.

"მერიის შენობასთან პროტესტი სამუშაო საათებში იმიტომ გადმოინაცვლებს, რომ აქაურ საჯარო მოხელეებს შევახსენოთ პირველ რიგში, ის რაც ქვეყანაში ხდება, ის რომ არჩევნები მოგვპარეს, ის, რომ ჩვენი თანამებრძოლები ამდენი ხანია უკვე დატყვევებულები არიან და უკანონო პატიმრობა ემუქრებათ. ზოგადად, ჩვენდა სამწუხაროდ ყოველთვის ესე ხდება საჯარო მოხელეებს ნებისმიერი ხელისუფლება იყენებს ხოლმე არჩევნების დროს და ასე მოხდა ამ არჩევნების დროსაც, მათი დუმილი არის ერთი - ერთი, რის გამოც აქ გადმოვინაცვლებთ ხოლმე და შევახსენებთ, რომ არ არის დუმილის დრო. ასე თეთრი და შავი ჯერ არასდროს არ ყოფილა მოვლენები და თუ ჩუმად არიან ესე იგი ამ ძალადობის მხარეს არიან, ეს გვინდა რომ ვუთხრათ, ამიტომ ვართ აქ", - განმარტავს ვართაგავა.

ცნობისთვის, საპროტესტო აქციის მონაწილეები 18:30 საათზე მსვლელობით გადაინაცვლებენ სახელმწიფო რწმუნებულის ადმინისტრაციის შენობასთან, სადაც სიტყვით გამოსვლები გაიმართება და დამონტაჟდება მონიტორი, რომელზეც მოქალაქეები თბილისში მიმდინარე საპროტესტო აქციის ტრანსლაციას უყურებენ.

შეგახსენებთ, მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში, მათ შორის ზუგდიდში, პერმანენტული საპროტესტო აქციები იმართება.

ამავე თემაზე:

ზუგდიდის მერიის შენობასთან მორიგი საპროტესტო აქცია მიმდინარეობს (ფოტო)

"ბრძოლა გამარჯვებამდე" - ზუგდიდში მორიგი აქცია მერიის შენობასთან გაიმართება

„საქართველო - ევროპაა“, - პროტესტის 25-ე დღე ზუგდიდში (ფოტო)

ზუგდიდში უწყვეტი საპროტესტო აქციები გრძელდება (ფოტო)

პროტესტის მე-20 დღე - ზუგდიდში პროევროპული აქცია გრძელდება (ფოტო)