ზუგდიდში, სახელმწიფო რწმუნებულის ადმინისტრაციის შენობის წინ, აქცია დაიწყო.

მოქალაქეები, მათ შორის, სამოქალაქო აქტივისტები, სტუდენტები, აბიტურიენტები და ოპოზიციური პარტიების წარმომადგენლები, „ქართული ოცნების“ მიერ ევროკავშირთან მოლაპარაკებების გახსნის 2028 წლამდე შეჩერებას მე - 9 დღეა აპროტესტებენ. 

სიტყვით გამოსვლის დაწყებამდე, ახალგაზრდები სხვადასხვა საპროტესტო შინაარსის პლაკატებით გამოხატავენ საკუთარ პოზიციას. 

„ჩვენ დღითი დღე გვემატება ხალხი, დღითი დღე იმატებს მუხტი, ამ პროტესტმა მოიტანა შედეგები, იფიცებიან საჯარო მოხელეები და ელჩები, ეს პლაკატი, რომელიც ხელში მიჭირავს, ნიშნავს იმას, რომ ჩვენ არ შევეგუებით გაუნათლებლობას, ეს არის ევროპული საქართველოსთვის მიუღებელი, ამიტომ, ეს აქციები გაგრძელდება“, - ამბობს აქციის მონაწილე აბიტურიენტი.

აფხაზეთიდან დევნილ სტუდენტს, მარიამ ნარმანიას, ხელში უჭირავს ბანერი, წარწერით: „ევროპაში შესვლით, სახლში დავბრუნდებით“ და თბილისში აქციაზე მძიმედ დაშავებული ზუგდიდელი თანატოლის. ალექსი თირქიას ფოტო:

,,ვინც რუსთაველზე დგას, მათი მიზანია, რომ მშვიდობიანად, ბედნიერად და ლაღად ვიყოთ ჩვენს ქვეყანაში და არა სხვა ქვეყანაში...„მე ვარ დევნილი აფხაზეთიდან და ჩემი დიდი სურვილი და ოცნებაა, რომ სახლში დავბრუნდე და ვფიქრობ, რომ ჩემს სახლში დასაბრუნებლად ზუსტად ევროპა დამეხმარება, რადგანაც ზუსტად ევროპა არის ჩემთვის ნათელი, მშვიდი მომავალი.. ზუგდიდელი ალექსანდრე თირქია ზუსტად ჩემი ხნისაა, მან დაკარგა თვალი, რატომ? მხოლოდ და მხოლოდ იმიტომ, რომ ამა დამიანს სურდა თავის სამშობლოში მშვიდობიანად ეცხოვრა, ვფიქრობ რომ ადამიანი სამშობლოს სიყვარულის მიზეზით არ უნდა კარგავდეს საკუტარ ჯანმრთელობას და სიცოცხლეს და მომავალს“, - 
გვითხრა მან.

28 ნოემბრიდან, ხალხმრავალი დემონსტრაციები იმართება თბილისსა და საქართველოს სხვადასხვა ქალაქში.

მათი მონაწილეების განცხადებით, ქვეყანაში მიმდინარე პროცესები საქართველოს სახელმწიფოებრიობის შენარჩუნებასა და კონსტიტუციის 78-ე მუხლის დარღვევას ეხება, რომელიც ხელისუფლებას ევროპულ და ევროატლანტიკურ სტრუქტურებში საქართველოს სრული ინტეგრაციის უზრუნველსაყოფად ყველა ზომის მიღებას ავალდებულებს.

ამავე თემაზე:

„გაიფიცე“, - ახალგაზრდების აქცია ზუგდიდის მერიასთან

„სად მივდივართ? - ევროპაში! , - აქციის მონაწილეებმა ზუგდიდის ქუჩებში მსვლელობას მართავენ (ფოტო)

ხელახალი არჩევნები, ცესკოს რეფორმა - რას ითხოვენ ზუგდიდში აქციის მონაწლეები (ფოტო)